سولتۇستىك قازاقستاندا ماس كۇيدە كوشەدە جاتقان اكىم جۇمىستان قۋىلدى

پەتروپاۆل. قازاقپارات - سولتۇستىك قازاقستان وبلىسىندا ادەپ كەڭەسى قوعامدىق ورىندا ماس كۇيدە جۇرگەن تيميريازيەۆ اۋدانىنىڭ سەليننىي اۋىلدىق وكرۋگىنىڭ اكىمى اقان قويشىبايەۆقا قاتىستى تارتىپتىك ءىستى قارادى، دەپ حابارلايدى قازاقپارات ءتىلشىسى.

قىزمەتتىك تەكسەرىس ماتەريالدارىنا قاراعاندا، دەمالىستا جۇرگەن اۋىل اكىمىن ىشكى ىستەر جەلىلىك ءبولىمىنىڭ قىزمەتكەرلەرى «پەتروپاۆل» ستانساسىندا ۇستاپ، اكىمشىلىك حاتتاما تولتىرعان. شەنەۋنىككە 5 ا ە ك مولشەرىندە ايىپپۇل سالىندى.

«قويشىبايەۆتىڭ ايتۋىنشا، ول ءبىر بوتەلكە سىرا ءىشىپ، سودان مازاسىزدانعان. ءبىراق مەديتسينالىق ساراپتاما ناتيجەسىندە وعان «ورتاشا اۋىر الكوگولدىك ماستىق» دياگنوزى قويىلدى»، - دەيدى مەملەكەتتىك قىزمەت سالاسىنداعى باقىلاۋ باسقارماسىنىڭ باس مامانى نۇرگۇل قاحابايەۆا.

اكىمشىلىك قۇقىقبۇزۋشىلىق تۋرالى قاۋلى زاڭدى كۇشىنە ەنگەن.

ادەپ كەڭەسىنىڭ مۇشەلەرى قويشىبايەۆتىڭ اكىمشىلىك جاۋاپقا تارتىلعانىنا تەكسەرىس جۇرگىزدى. كەڭەس ءتوراعاسى، مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنىڭ باسشىسى عالىم تۇرسىنبايەۆ شەنەۋنىكتىڭ بۇل ارەكەتىن مەملەكەتتىك قىزمەت تۋرالى زاڭدى بۇزۋ دەپ باعالادى.

«ونىڭ نەلىكتەن پوليتسيانىڭ نازارىنا ىلىككەنىن ايتايىن. مەديتسينالىق ساراپتاماعا قاراعاندا، ول كوشەدە وزدىگىنەن قيمىلداۋعا شاماسى كەلمەي جاتقان. كوشەدە جاتقان كەز كەلگەن شەنەۋنىك مەملەكەتتىك قىزمەت اتقارماۋى ءتيىس»، - دەيدى ع. تۇرسىنبايەۆ.

ادەپ كەڭەسىنىڭ مۇشەلەرى تيميريازيەۆ اۋدانىنىڭ اكىمىنە قويشىبايەۆتى لاۋازىمىنان بوساتۋدى ۇسىندى.