سالت اتپەن ساياحاتقا اتتانعان ماجارلىقتار شىعىس قازاقستانعا جەتتى
وسكەمەن. قازاقپارات - ماجارلىق دارىگەر يشتۆان بەنتسە ەكى وتانداسىمەن بىرىگىپ، سالت اتپەن ۇلى جىبەك جولىنىڭ بويىن شارلاپ، 5 جىلدىق ەكسپەديتسياعا اتتانعان بولاتىن.
بۇل جازدا ساياحاتشىلار تۇركى وركەنيەتى قالىپتاسقان شىعىس قازاقستانعا باردى، دەپ حابارلايدى قازاقپارات ءتىلشىسى ءوڭىردىڭ اقپارات ورتالىعىنا سىلتەمە جاساپ.
ۇلى جىبەك جولى مىڭداعان جىلدار بويى ازيا مەن ەۋروپانى جالعاعان التىن كوپىر بولدى. قوس قۇرلىقتىڭ مادەني جانە ەكونوميكالىق اراقاتىناسى بۇل جولدى مەكەن ەتكەن حالىقتاردىڭ تىرشىلىگىنە ىقپالىن تيگىزبەي قويمادى.
ەكسپەديتسيانىڭ ءبىرىنشى كەزەڭى 2016-جىلى باستالدى. عۇندار كەزەڭىندەگى كيىمدەرگە ورانعان سالت اتتىلار ماجارستاننان ءازىربايجاننىڭ استاناسى - باكۋگە دەيىن جەتكەن.
وسى جازدا سالت اتتىلار ەكسپەديتسيانى «استانادان شىڭعىسحان يمپەرياسىنىڭ ورداسى - قاراقورىمعا دەيىن» ۇرانىمەن جالعاستىردى. ساياحاتشىلار قازاقستاننىڭ شىعىس وڭىرلەرىن تۇگەل قامتىپ، ەرەيمەنتاۋ - ەكىباستۇز - پاۆلودار - سەمەي - اباي اۋدانى - جارما اۋدانى - وسكەمەن - ۇلكەن نارىن - قاتون- قاراعاي باعىتتارىمەن ءجۇرىپ وتەدى. شىعىس قازاقستاندى ارالاۋ كەزىندە ماجارلار قوڭىر-اۋليە ۇڭگىرى، ابايدىڭ «جيدەباي- ءبورىلى» مەملەكەتتىك تاريحي-مادەني جانە ادەبي-مەموريالدىق قورىق-مۋزەيى، بەرەل قورعاندارى، اشىق اسپان استىنداعى «شىنى ساركوفاگ» سىندى تاريحي جەرلەردى ارالادى. سونداي-اق، ەكسپەديتسيا مۇشەلەرى و. بوكەيدىڭ مۋزەي- ۇيىنە، ا. ەرەجەپ ۇلى اتىنداعى مۋزەي-مەكتەبىنە بارىپ، قاراتاي باتىرعا ارنالعان ەسكەرتكىشتى تاماشالادى. ءار اۋداننىڭ تۇرعىندارى جولاۋشىلارعا ۇلتتىق استان ءدام تاتقىزىپ، قازاق حالقىنىڭ سالت-داستۇرىمەن، ويىندارىمەن تانىستىرىپ ءوتتى. وسى ۋاقىت ىشىندە ماجارلىق قوناقتار شىعىس قازاقستاننىڭ تابيعاتىنا ەرەكشە ءتانتى بولدى.
«ءبىز تەك وسى ءوڭىردىڭ ءوزىنىڭ ءارتۇرلى تابيعي ايماقتارىندا بولدىق. ءشول جانە شولەيت جەرلەردى، قازاقتىڭ كەڭ دالاسىن ارالاپ، تاۋلاردى تاماشالادىق. تابيعاتتىڭ سۇلۋلىعىن سوزبەن ايتىپ جەتكىزۋ مۇمكىن ەمەس»، - دەپ ءبولىستى يشتۆان بەنتسە.
ەكسپەديتسيا قازاقستاننان كەيىن موڭعوليادا جالعاسىن تابادى. سايحاتشىلاردىڭ ايتۋىنشا، وسىنشاما ۇزاق جولدى وتكەرۋدە قازاقستاننىڭ قوناقجاي، مەيىرىمدى حالقى ۇنەمى كومەكتەسىپ تۇراتىن كورىنەدى.
