قازاقستاندا تەرروريستىك اكتىلەر جاساماق بولعان راديكالدى توپ ۇستالدى
استانا. قازاقپارات - 25- ماۋسىم كۇنى ق ر ۇلتتىق قاۋىپسىزدىك كوميتەتى ورال قالاسىندا راديكالدى ءدىني توپ مۇشەلەرىن ۇستادى، دەپ حابارلايدى قازاقپارات.
«ارنايى وپەراتسيا جۇرگىزۋ بارىسىندا 8 توپ مۇشەسى ۇستالدى، اتىس قارۋى، وق-دارىلەر جانە ءدىني ماتەريالدار الىندى.
كورسەتىلگەن ادامدار قازاقستان اۋماعىندا ءبىرقاتار تەرروريستىك اكتىلەر جاساۋعا دايىندالعان، تەرروريزمدى ناسيحاتتاعان، سونداي-اق مۇلىكتىك قىلمىستار جاساعان دەپ كۇدىكتەلۋدە. وسى فاكتىلەر بويىنشا سوتقا دەيىنگى تەرگەۋ باستالدى، وزگە اقپارات تەرگەۋ مۇددەسىندە جاريالاۋعا جاتپايدى»، - دەلىنگەن ۇ ق ك تاراتقان اقپاراتتا.
