الماتى كوشەلەرىندەگى كارىز قاقپاقتارىنىڭ قايدا كەتكەنى بەلگىلى بولدى

الماتىلىقتار وسى ماسەلەگە قاتىستى جولدىڭ ورتاسىنداعى ءىرى قالالىق ماگيسترالداردا سۋ اعاتىن ارنالار مەن كارىز قۇبىرلارىنىڭ اۋزى اشىلىپ، ۇڭىرەيىپ جاتقان فوتولارى مەن ۆيدەولارىن الەۋمەتتىك جەلىلەرگە جاريالادى.

تۇركسىب اۋداندىق ىشكى ىستەر باسقارماسىنىڭ مالىمەتىنە سايكەس، مۇلىكتىك قىلمىستارى ءۇشىن بۇعان دەيىن دە بىرنەشە رەت سوتتالعان 24 جاستاعى اڭسار اليشەردىڭ كارىز ليۋكتەرىنىڭ قاقپاقتارىن ۇرلاۋ بويىنشا جەتى فاكتىگە قاتىسى بارى انىقتالدى. بارلىق ماتەريالدىق دالەلدەر ۋاقىتىندا الىنعاندىقتان، ول ۇرلانعان زاتتاردى ساتىپ ۇلگەرمەگەن. كۇدىكتى سوتقا تارتىلدى.

«شويىننىڭ قارا مەتالل قابىلدايتىن ورىنداردا ەرەكشە باعالى ەكەنى بارشامىزعا ءمالىم. سوندىقتان ءبىرىنشى كەزەكتە بارلىق مەتالل قابىلدايتىن كاسىپورىندار تەكسەرىلدى. جانە تەكسەرىستەن كەيىن كۇماندى زاتتاردى قابىلداعان تۇلعالارعا قاتاڭ جاۋاپكەرشىلىككە تارتىلاتىنى تۋرالى ەسكەرتۋ جاسالدى. ادەتتە ۇرىلار تۇندە قيمىلدايدى. مۇنداي قىلمىس ءتۇرى - باسقا جاقتان كەلگەن، جەڭىل جولمەن اقشا تابۋدى كوزدەيتىن ادامداردىڭ ارەكەتى. جانە ولار كوممۋنالدىق كاسىپورىندارعا، ەڭ باستىسى - قالا تۇرعىندارىنا ايتارلىقتاي زيان كەلتىرىپ جاتقانىن ويىنا دا المايتىن سەكىلدى»، - دەپ حابارلادى الماتى ءى ءى د-نىڭ باسپا ءسوز قىزمەتى.

سونىمەن بىرگە، پوليتسياداعىلار قارا جانە ءتۇستى مەتالل قابىلدايتىن پۋنكتەردى ءجىتى قاداعالاۋ تۋرالى دا حابارلادى. ءىس جۇزىندە ۇرلانعان اۆتوموبيل اككۋمۋلياتورلارىن وتكىزۋ جاعدايلارى ءجيى كەزدەسەدى.

«مەن كاسىبىمدى ەكى اي بۇرىن باستادىم. اككۋمۋلياتور قابىلدايمىن، ءبىراق ليۋكتەردىڭ قاقپاقتارىن مۇلدە المايمىن. باتارەيالاردى اكەلگەندە مىندەتتى تۇردە ۇرلانعان- ۇرلانباعانىن سۇراپ الامىن. قازىر مەن ۇرلانعان تاۋارلاردى ساتىپ الۋ ارقىلى قىلمىستىق جاۋاپكەرشىلىككە تارتىلۋىم مۇمكىن ەكەنىن ءتۇسىندىم. بۇدان بىلاي كۇدىكتى نارسەلەرمەن بايلانىسقىم كەلمەيدى»، - دەيدى الماتى قالاسى بەكماحانوۆ كوشەسىندە وبەكتىسى بار 32 جاستاعى كاسىپكەر.

الماتى قالاسىنىڭ پوليتسياسى ازاماتتاردى وزدەرىنىڭ ازاماتتىق ۇستانىمدارىن بەلسەندى تۇردە كورسەتۋگە، سونداي-اق كارىز ليۋكتەرىنىڭ قاقپاقتارىن ۇرلاۋ جانە ونى ساتىپ الاتىن ورىندار تۋرالى كەز كەلگەن اقپاراتتى دەرەۋ مىنا تەلەفوندارعا حابارلاۋعا شاقىرادى:

2544007؛ 87075005906 نەمەسە 102. شىنايى اقپارات ءۇشىن سىياقى بەرىلەدى.

فوتو: news.nashbryansk.ru