تەمەكىنى دۇكەن سورەلەرىنەن مۇلدەم الىپ تاستاۋ جوسپارلانعان

زەرتتەۋگە سايكەس، ادام ونداي ونىمدەردى كورمەسە، تەمەكى شەگۋگە دەگەن ىنتاسى ازايادى، دەپ حابارلايدى قازاقپارات ءتىلشىسى.

تەمەكىگە قارسى كواليتسيانىڭ مۇشەسى ءجاميليا سادىقوۆانىڭ ايتۋىنشا، بۇگىندە تەمەكى ونىمدەرىن سورەگە شىعارۋعا تىيىم سالۋ تۋرالى ۇسىنىس بار. وندايدا تەمەكىنى مۇلدەم الىپ تاستايدى، يا بولماسا، پەردەمەن جاۋىپ قويادى. «ماسەلەن، قازىر دۇكەن كاسساسىنا كەلگەندە جوعارى جاقتا تەمەكىنىڭ ءتۇر-ءتۇرى ءىلىنىپ تۇرادى. جاڭاعى شارا زاڭدى تۇردە ەنگىزىلسە، بارلىق تەمەكى ونىمدەرى پەردەمەن جابىلادى. سەبەبى ادام تەمەكىنى كورگەندە شەگۋگە دەگەن ىنتاسى ارتادى. رەسەي اتالعان شارانى ەنگىزدى. ول جاقتا بارلىق تەمەكىنى پەردەمەن جاۋىپ وتىرادى. ساتىپ الۋشىعا تەمەكىنىڭ ءتىزىمى بەرىلەدى. سول جەردە باعاسى دا، ماركاسى دا جازىلادى. وسىلايشا، تاڭداۋ قۇقىعى بەرىلەدى. بىزدە وسى ىسپەتتى شارانى قولدانۋ ءۇشىن قازىرگى زاڭناماعا تۇزەتۋلەر ەنگىزۋ كەرەك. كورەمىز، جىلدىڭ سوڭىنا دەيىن دەنساۋلىق ساقتاۋ مينيسترلىگى تەمەكى ونىمدەرىن جاۋىپ وتىرۋعا قاتىستى وزگەرىستەردى دايىنداپ شىعارۋى ءتيىس. ودان كەيىن پارلامەنت بار»، - دەدى ج. سادىقوۆا قازاقپارات تىلشىسىنە بەرگەن سۇحباتىندا.

ونىڭ سوزىنە قاراعاندا، بۇگىندە تەمەكىمەن كۇرەس سالاسىنداعى ەڭ ءتيىمدى شارا ول - اكسيزدەردى كوتەرۋ. سونىڭ ارقاسىندا تەمەكىنى تۇتىنۋ كولەمىن 50 پروتسەنتكە ازايتۋعا بولادى. «ودان كەيىن قوعامدىق جەرلەردە تەمەكى شەگۋگە تىيىم سالۋ شاراسى كەلەدى. سوسىن قوراپتارعا قورقىنىشتى سۋرەتتەردى ورنالاستىرۋ بار. ال تەمەكى ونىمدەرىن سورەدەن الىپ تاستاۋ، جاڭاعى پەردەلەردى قولدانۋ - بۇنىڭ بارلىعى قوسىمشا شارالار»، - دەپ اتاپ كورسەتتى ج. سادىقوۆا.