قاجىمۇقاننىڭ ۇشاعى قايدا؟

 «موسكۆا، س س  سر قورعانىس كوميتەتىنە، جوعارعى باس قولباسشى ي. ۆ. ستالين جولداسقا. مەن، قازاق حالقىنىڭ اتاقتى پالۋانى قاجىمۇقان مۇڭايتپاسوۆ، ءوزىمنىڭ تاپقان تابىسىمنان ءجۇز مىڭ سوم اقشانى سوۆەت ارمياسىنىڭ پايداسىنا بەرىپ وتىرمىن. سول اقشاعا سامولەت جاساتۋدى وتىنەمىن. ءسويتىپ، ول سامولەتتى مايدانعا جىبەرىپ، ەڭ جاقسى قازاق ۇشقىشىنا تابىس ەتۋدى سۇرايمىن. سوۆەتتىك وتاننىڭ جەڭىسىنە تىلەكتەستىكپەن قاجىمۇقان مۇڭايتپاسوۆ» .

 سونىمەن سامولەت جاسالدى. سولتۇستىك باتىس مايدانىنا جىبەرىلدى. ناق سول كەزدە قازاقستان كومسومول- جاستارى جيناعان قارجىعا جاسالعان تاعى ءبىر سامولەت كەلدى. مىنە، وسى ەكى سامولەتتىڭ العاشقىسىندا قاجىتاي شالابايەۆ ۇشتى، ەكىنشىسى راشيت بەكەتوۆكە بەرىلدى. مايدان اسپانىندا «قازاقستان كومسومولدارى» اتتى سامولەتپەن بىرگە، قاناتىنىڭ استىندا «قاجىمۇقان» دەگەن جازۋى بار يسترەبيتەل قاتار سامعادى. بۇل سامولەت ءبىزدىڭ جەڭىسىمىزگە ءوز ۇلەسىن قوستى. ول ۇشاقتار كەيىن بالتىق بويىنداعى اسكەري مۇراجايعا تابىستالدى.

 zhasorken.kz