09:29, 01 - ماۋسىم 2018 | GMT +5
قازاقپارات قىتايلىق شينحۋا اقپارات اگەنتتىگىمەن جاڭالىقتار ىقپالداستىقتىعىن كەڭەيتەدى
بەيجىڭ. قازاقپارات - 31 -مامىر كۇنى بەيجىڭدە «قازاقپارات» ح ا ا باس ديرەكتورى اسقار ۋماروۆ «شينحۋا» قىتايلىق اقپارات اگەنتتىگىنىڭ باس ديرەكتورى شاۋ مينجاۋمەن جانە China Economic Net-تىڭ پرەزيدەنتى ۋاڭ سيۋيدۋنمەن كەلىسسوزدەر وتكىزدى، دەپ حابارلايدى «قازاقپاراتتىڭ» قىتايداعى مەنشىكتى ءتىلشىسى.
«شينحۋا» اگەنتتىگىنىڭ باسشىلىعىمەن كەزدەسۋ بارىسىندا تاراپتار ىقپالداستىقتىڭ جاي- كۇيى مەن كەلەشەگىن، ەكونوميكالىق جاڭالىقتار باعىتىندا ءوزارا ىنتىماقتاستىقتى نىعايتۋ ماسەلەسىن تالقىلادى. سونداي-اق «ءبىر بەلدەۋ، ءبىر جول» اياسىندا ەكونوميكالىق اقپاراتتار اليانسىن قۇرۋ مۇمكىندىگى بويىنشا پىكىر الماستى.
China Economic Net-پەن كەلىسسوزدەر بارىسىندا ەكى ب ا ق-تىڭ وزەكتى ەكونوميكالىق پروبلەمالار بويىنشا اقپارات تاراتۋداعى تاجىريبەلەرى، سونىڭ ىشىندە جاڭالىقتاردى ۇسىنۋدىڭ جاڭا فورماتتارى ءسوز بولدى.
ا. ۋماروۆ شاڭحاي ىنتىماقتاستىعى ۇيىمىنىڭ I مەديا- سامميتىنە قاتىسۋ ءۇشىن قىتايعا جۇمىس ساپارى اياسىندا بەيجىڭدە ءجۇر. مەديا-سامميت 1 -ماۋسىم كۇنى «دياويۋيتاي» مەملەكەتتىك رەزيدەنسياسىندا وتەدى.
