ديماش قۇدايبەرگەن اقتوبەدە فاناتتارىمەن كەزدەستى
اقتوبە. قازاقپارات - ديماش قۇدايبەرگەننىڭ فانتوپ جەتەكشىلەرى بەيسەنبى كۇنى انشىمەن، ونىڭ وتباسىمەن كەزدەسۋگە مۇمكىندىك الدى، دەپ حابارلايدى قازاقپارات ءتىلشىسى.
«جەتى اي بۇرىن تۋعان كۇنىمنەن سوڭ يۋتۋبتى قاراپ وتىرىپ، ديماشتى كوردىم. كەيىن قىتايداعى بايقاۋدا ايتقان اندەرىن تىڭداپ، بىردەن عاشىق بولدىم. ارمانىم انشىمەن كەزدەسۋ بولدى. تۇرمىستامىن، ەكى بالام بار. شىنىمدى ايتسام، كۇيەۋىم مەنى ديماشتان كىشكەنە قىزعانادى. مەن قازاقستانعا كەلگەنىمە، ديماشتى كورگەنىم ءۇشىن باقىتتىمىن»، - دەدى ديماش قۇدايبەرگەننىڭ پولشاداعى فانتوپ جەتەكشىسى مونيكا ۆاسيلەۆسكايا.
ديماش قۇدايبەرگەننىڭ فاناتتارى «دايديداۋ» ءانىن جاقسى كورەدى ءارى ءجيى تىڭدايدى. ءتىپتى، ءارقايسىسى ۇيالى تەلەفوندارىنا تەك ديماشتىڭ اندەرىن جۇكتەپ العان. ولار قازاق ءتىلىن دە ۇيرەنىپ ءجۇر.
«ديماش ادامداردىڭ ءومىرىن وزگەرتەدى جانە الەم حالقىن بىرىكتىرەدى. العاش رەت الەۋمەتتىك جەلىدەن كورىپ، تاڭقالدىم. ءوزىم وتكەن جىلى ەكسپو كورمەسى اياسىندا بولعان «باستاۋ» كونسەرتىندە بولدىم. ءوزىم ا ق ش-تا تۇرعانىممەن، ويىم ۇنەمى قازاقستاندا. ديماشتىڭ انا تىلىندە ورىنداعان اندەرىنىڭ سوزدەرىن تۇسىنبەيمىن، ءبىراق جۇرەگىممەن سەزىنەمىن»، - دەدى ا ق ش كەلگەن فانتوپ جەتەكشىسى اليسا كەللوگ.
ايتا كەتەيىك، فانتوپ مۇشەلەرى ەرتەڭ ديماش قۇدايبەرگەن وقىعان مەكتەپ پەن كوللەدجگە بارىپ، «باقىتتى بالا» بايقاۋىنا قاتىسىپ، قازاقستاندىق ونەرپازداردىڭ كونسەرتىن تاماشالايدى.
«ديماشتى دوستارى، وتباسى قاتتى جاقسى كورەدى. ول ءوز وتانىنىڭ پاتريوتى. بۇل الەم ءۇشىن ۇلگى، جاقسى مىسال»، - دەدى اليسا كەللوگ.
