بوسانعان سوڭ ايەل ادامنىڭ داۋىسى وزگەرەدى - عالىمدار

استانا. قازاقپارات - ۇلىبريتانيا عالىمدارى ايەل ادامنىڭ ءبىرىنشى رەت بوسانعان سوڭ داۋىسى وزگەرەتىنىن انىقتادى.

سەسسەكسكي ۋنيۆەرسيتەتىنىڭ مامانى كاتارجينا پيزانسكي (Katarzyna Pisanski) مەن ارىپتەستەرىنىڭ ايتۋىنشا، بۇل گورموندار مەن ايەل ادامنىڭ انا رولىنە ەنۋىمەن تىكەلەي بايلانىستى. زەرتتەۋ جۇمىسى EvolutionHuman Behavior جۋرنالىندا جاريالاندى، دەپ حابارلايدى Baq.kz اقپارات اگەنتتىگى.

زەرتتەۋ جۇمىسىنا 20 جاس انا جانە ولاردىڭ انا اتانىپ ۇلگەرمەگەن 20 قۇرداسى تاڭدالدى. ماماندار جەكە ارحيۆتەردەن ولاردىڭ داۋىستارى باسىلعان جازبالاردى الىپ زەرتتەدى. بالا بوسانعانعا دەيىن جانە كەيىن داۋىستارىنىڭ قانداي بولعانىن باقىلادى. زەرتتەۋ بارىسىندا جالپى ۇزاقتىعى 277 مينۋت بولاتىن 634 جازبا تىڭدالدى.

ناتيجەسىندە ايەل ادام بوسانعان سوڭ داۋىسىنىڭ تونى ورتاشا ەسەپپەن %5 تومەندەيتىنى بەلگىلى بولدى. بۇل 1,3 مۋزىكالىق جارتىلاي تونعا تەڭ. جاڭا بوسانعان ايەلدەردىڭ داۋىس ىرعاعى ءبىر جىلدان كەيىن قالىپقا كەلەدى.

«بۇل نەگىزىنەن گورموندىق وزگەرىستەرمەن بايلانىستى بولۋى مۇمكىن. وسى ۋاقىتقا دەيىن عالىمدار ايەل ادامنىڭ داۋسى ءار اي سايىن وۆۋلياتسيا كەزىندە كوتەرىلىپ، مەنوپاۋزا ۋاقىتىندا تومەندەيتىنى بەلگىلى ەدى. سونداي- اق، ءبىز جۇكتىلىك كەزىندە جىنىستىق گورمونداردىڭ دەڭگەيى كۇرت تومەندەيتىنىن دە جاقسى بىلەمىز. ال بۇل ءوز كەزەگىندە ۆوكاليزاتسياعا اسەر ەتەدى. ايەل ادام انا اتانعان سوڭ ءوزىن بالاسىنا باسقا قىرىنان كورسەتكىسى كەلەدى. ياعني ادەيى داۋىسىن وزگەرتىپ سويلەۋى مۇمكىن» ، - دەيدى كاتارجينا پيزانسكي.

 Baq.kz