ءىلياس جانسۇگىروۆتىڭ ۇلى اكەسىنىڭ ءولىمى جايلى اشى شىندىعىن ايتتى

  استانا. قازاقپارات - قازاق ادەبيەتىنىڭ بايتەرەگى ءىلياس جانسۇگىروۆ ءومىرىنىڭ سوڭعى ساتتەرى جايلى ۇلى سايات ءىلياس ۇلى وتكىر دەرەك كەلتىردى دەپ حابارلايدى «ايقىن» باسىلىمى.

سايات ءىلياس ۇلى - ءىلياس جانسۇگىروۆتىڭ ءۇشىنشى ايەلى، ياعني فاتيما تورەبايەۆادان تۋعان بالاسى. ايتۋىنشا، اكەسى مەن اناسى فاتيما 1928 -جىلى سول زامانداعى ەلدىڭ استاناسى قىزىلوردادا تانىسقان. الايدا، ونىڭ ەكى جاسىندا اكەسى مەن شەشەسى اجىراسىپ كەتكەن.

جاسى توقسانعا تاياعان اقساقال ەل ازاماتىنىڭ ۇلى ەكەنىنە سەنبەيتىندەرگە كورسەتەتىن قۇجاتى بار ەكەنىن دە راستايدى.

«حالىق جاۋىنىڭ» ۇرپاعى دەگەن قۇجاتىم بار. ءبىر جاپىراق كۋالىك - ءىلياس جانسۇگىروۆتىڭ بالاسى ەكەنىمدى رەسمي دالەلدەيتىن قۇجات.

سايات جانسۇگىروۆتىڭ ايتۋىنشا، اكەسىنىڭ تاعدىرى جايلى ايتۋ ونىڭ جۇرەگىنە شانشۋداي قادالادى. ول وسى ۋاقىتقا دەيىن بۇرمالانىپ كەلگەن ءبىرقاتار دەرەكتەردىڭ اق- قاراسىن ايىرىپ بەردى.

1938 -جىلى 26 - اقپاندا اكەمدى تۇندە اتقان. الماتىنىڭ ىرگەسىندەگى جاڭالىق اۋىلىندا قۇلاعالى تۇرعان ۇيلەردىڭ ىرگەسىنە تاستاي سالعان. جەندەتتەر ءۇيدىڭ قابىرعاسىن ۇستىنە قۇلاتىپ، كومبەي جونىنە جۇرە بەرگەن. فاتيما عابيتوۆاعا ءبىر ايدان سوڭ «ءسىزدىڭ كۇيەۋىڭىز سىبىردەگى لاگەرلەردىڭ بىرىندە جۇرەك اۋرۋىنان قايتىس بولدى» دەگەن مازمۇنداعى حات كەلگەن دەيدى زامانداستارى. تۇرمەدەن كەلگەن حاتتاردا «الاشوردالىقتار ايداۋعا كەتكەن، بايلانىسۋعا بولمايدى» دەپ شىندىقتى بىزگە ايتپاعان.