قازاقستاندا پويىز بيلەتىن ساتاتىن جاڭا ينتەرنەت- رەسۋرس اشىلدى
جوبانى «ق ت ج» ۇ ك» ا ق فيليالى - «باس ەسەپتەۋ ورتالىعى» مەملەكەتتىك «سيفرلى قازاقستان» باعدارلاماسى اياسىندا جۇزەگە اسىرۋدا. جاڭا سايتتا پويىزدىڭ ءجۇرۋ بيلەتىن ارنايى كابينەت ارقىلى اۆتورلاندىرۋسىز رەسىمدەۋگە بولادى.
«سايتتا «كۇتۋ پاراقشاسى» قىزمەتى بار. تۇتىنۋشى ول ارقىلى بيلەت بولماعان جاعدايدا، كەزەككە دە تۇرا الادى. بوس ورىن بولعان جاعدايدا تۇتىنۋشىنىڭ ەلەكتروندى پوشتاسىنا حابارلاما تۇسەدى. سونداي- اق، جولاۋشىلار بۇرىن ساتىپ الىنعان بيلەتتەردى سايت ارقىلى قايتا وتكىزە الادى. ديسكونت كارتا ارقىلى «بارۋعا» جانە «قايتۋعا» بيلەتتەردى ءبىر تاپسىرىس كەزىندە رەسىمدەۋگە بولادى»، - دەلىنگەن حابارلامادا.
ودان بولەك، سايتتا پويىز كەستەسى تۋرالى انىقتامالىق اقپارات، بوس ورىندار، پويىز بيلەتىنىڭ باعاسى، جولاۋشىلارعا ءتيىمدى جەڭىلدىكتەر تۋرالى مالىمەتتەر جيناقتالعان. تۇتىنۋشى جولاۋشىلاردىڭ باعالاۋىنا سايكەس، پويىزداردىڭ قىزمەت كورسەتۋ ساپاسىنا قاتىستى رەيتينگىن دە كورەدى.
«پويىز بيلەتىن ساتىپ الۋعا حالىقارالىق تولەماقى جاساۋدىڭ Visa مەن MasterCard جۇيەسىن قولدانا الاتىن بارلىق ەكىنشى دەڭگەيلى بانكتەردىڭ تولەماقى كارتالارى قابىلدانادى. قيىن ماسەلە تۋىنداعاندا وپەراتوردىڭ online رەجىمدەگى كومەگىنە جۇگىنۋگە بولادى»، - دەيدى «ق ت ج» ۇ ك» ا ق فيليالى - «باس ەسەپتەۋ ورتالىعىنىڭ» ديرەكتورى تىلەۋجەن ورازبايەۆ.
جاڭا سايت ۇيالى تەلەفون قۇرىلعىلارىنا دا بەيىمدەلگەن.
اۆتور: ايان بەكەن ۇلى
