اۋا رايى: ەلىمىزدىڭ باسىم بولىگىندە جاۋىن جاۋىپ، جەل كۇشەيەدى

استانا. قازاقپارات - قازاقستاننىڭ باسىم بولىگىندە اتموسفەرالىق فرونتالدى بولىكتەردىڭ وتۋىنە بايلانىستى جاۋىن جاۋادى، تەك ەلدىڭ باتىسى مەن وڭتۇستىك- باتىسىندا عانا كۇن اشىق بولادى، دەپ حابارلايدى «قازگيدرومەت» ر م ك- سى.

كاسىپورىن تاراتقان مالىمەتتەرگە قاراعاندا، سارسەنبى كۇنى كەي جەرلەردە كۇن كۇركىرەپ، بۇرشاق جاۋىپ، جەل كۇشەيىپ، شاڭدى داۋىل كوتەرىلۋى، تۇمان ءتۇسۋى ىقتيمال.

شىعىس قازاقستان وبلىسىنىڭ ءبىرقاتار ايماقتارىندا بۇرشاق جاۋۋى مۇمكىن. سونداي-اق جەل كۇشەيىپ، تۇندە ونىڭ جىلدامدىعى سەكۋندىنا 15-20 مەتر، كۇندىز 15-20، ەكپىنى 23,28 مەترگە دەيىن بارۋى ىقتيمال.

جامبىل وبلىسىنىڭ كەي جەرلەرىندە تۇمان ءتۇسىپ، كۇندىز ءبىرقاتار ايماقتاردا بۇرشاق جاۋادى. جەل سەكۋندىنا 15-20 مەترگە دەيىن، ەكپىنى 23-28 مەترگە دەيىن كۇشەيەدى.

وڭتۇستىك قازاقستان، قىزىلوردا وبلىستارىنىڭ ءبىرقاتار ايماقتارىندا جەل سەكۋندىنا 15-20 مەترگە دەيىن كۇشەيىپ، شاڭدى داۋىل كوتەرىلەدى. وڭتۇستىك قازاقستان وبلىسىندا كۇندىز جەلدىڭ ەكپىنى سەكۋندىنا 23 مەترگە جەتەدى.

پاۆلودار، سولتۇستىك قازاقستان وبلىستارىندا جەل سەكۋندىنا 15-20 مەترگە دەيىن كۇشەيەدى. ەكپىنى كەي جەرلەردە 23-28 مەترگە دەيىن بارادى.

اقمولا وبلىسىندا جەل تۇندە كۇشەيىپ، جىلدامدىعى سەكۋندىنا 15-20 مەترگە دەيىن بارادى، ەكپىنى 23-28 مەترگە جەتەدى. كۇندىز كەي جەرلەردە جەل سەكۋندىنا 15-20 مەتر جىلدامدىقپەن ۇيتقىسا، تۇندە جانە تاڭ اتا تۇمان تۇسەدى.

الماتى وبلىسىندا كەي جەرلەردە جەلدىڭ كۇشى سەكۋندىنا 18-23 مەترگە جەتەدى، كۇندىز بۇرشاق جاۋۋى ىقتيمال.

قوستاناي، قاراعاندى وبلىستارىنىڭ ءبىرقاتار ايماقتارىندا جەلدىڭ جىلدامدىعى سەكۋندىنا 15-20 مەترگە جەتەدى. قوستاناي وبلىسىندا تۇندە تۇمان تۇسەدى. اقتوبە وبلىسىنىڭ كەي جەرلەرىندە جەل سەكۋندىنا 18 مەتر بولادى. كۇندىز اتىراۋ وبلىسىنىڭ ءبىرقاتار ايماقتارىندا كۇن قاتتى ىسيدى.