08:01, 17 - مامىر 2018 | GMT +5
قىزىلوردادا ۇزدىك قۇرىلىسشىلار بايقاۋى ءوتتى
قىزىلوردا. قازاقپارات - قىزىلوردادا ەلىمىزدىڭ بارلىق وڭىرىنەن كەلگەن قۇرىلىسشىلار ۇزدىك شەبەر اتاعى ءۇشىن باق سىناستى، دەپ حابارلايدى قازاقپارات ءتىلشىسى.
بۇل شارا «ۇزدىك قالاۋشى» جانە «ۇزدىك سىلاقشى» نوميناتسيالارى بويىنشا وتكىزىلدى. بىلىكتىلىك پەن شەبەرلىكتى سىنعا سالعان شاراعا قاتىسۋعا ەلىمىزدىڭ بارلىق وڭىرىنەن 30 عا جۋىق ازامات نيەت بىلدىرگەن. بايقاۋ بارىسىندا بارلىق تاپسىرمالاردى دۇرىس ورىنداۋمەن قاتار قاۋىپسىزدىك شارالارىن ساقتاۋ جانە شىعارماشىلىق كوزقاراستارى نازاردا ۇستالدى.
قازىلار القاسىنىڭ شەشىمىمەن ەلىمىزدىڭ ۇزدىك قالاۋشىسى رەتىندە اتىراۋلىق ايجارىق نيازوۆ تانىلدى. ال قاراعاندىلىق نينا دەركسەن ەلىمىزدىڭ ۇزدىك سىلاقشىسى اتاندى. جەڭىمپازدارعا باعالى سىيلىقتار تابىس ەتىلدى.
ءادىلجان ۇمبەت
