پاۆلودار وبلىسىندا قۇتىرۋ اۋرۋىنىڭ العاشقى دەرەگى انىقتالدى

«ەپيزووتيكاعا قارسى ءىس-شارالاردىڭ جۇرگىزىلۋىنە بايلانىستى قۇتىرۋ اۋرۋىنىڭ تارالۋ وشاقتارى سوڭعى بەس جىلدا ازايىپ كەلەدى. دەسە دە، بيىل وبلىسىمىزدا قۇتىرۋ اۋرۋىن جۇقتىرۋدىڭ ءبىر وقيعاسى تىركەلدى. بۇل كاچير اۋدانى ۆوسكرەسەنسك اۋىلدىق وكرۋگىنىڭ مالىە بەرەزنيكي اۋىلىندا تۇلكىمەن بايلانىستا بولعان يتتەن تابىلدى»، - دەدى راشيت نۇربەكوۆ.
ونىڭ ايتۋىنشا، بيىل ۆەتەرينارلىق الدىن الۋ شارالارىنىڭ جوسپارىنا سايكەس سەگىز اسا قاۋىپتى اۋرۋعا قارسى ءۇش ميلليونعا جۋىق شارا وتكىزىلەدى. - كۇيدىرگىگە قارسى ۆاكتسيناتسيالاۋ جۇمىستارى ءۇي جانۋارلارىنىڭ بارلىق ءتۇرىن قامتيدى، - دەدى راشيت نۇربەكوۆ. - ال ەمفيزەماتوزدى كاربۋنكۋلعا قارسى ۆاكتسينالاۋ وسى اۋرۋعا بەيىم جانۋارلارعا جاسالسا، جوعارى پاتوگەندى تۇماۋعا قارسى شارا ءۇي قۇستارىنىڭ بارلىق تۇرىنە جۇرگىزىلەدى. ءىس- شارالار رەسپۋبليكالىق بيۋدجەت ەسەبىنەن جۇزەگە اسىرىلادى. بۇل ماقساتتا 627 ميلليون تەڭگە قاراستىرىلعان. جالپى، 2018-جىلى 28 اسا قاۋىپتى ينفەكتسيا بويىنشا دياگنوستيكالىق زەرتتەۋ وتكىزىلەدى. وكىنىشكە وراي، ءۇي جانۋارلارىنىڭ اراسىندا برۋتسەللەز اۋرۋى كەڭ تارالعان».
ايتا كەتەرلىگى، بيىل برۋتسەللەزدى انىقتاۋ ماقساتىندا 550 مىڭ ءىرى قارا مال مەن 860 مىڭ ۇساق قارا مالدىڭ قان سارىسۋى زەرتتەلەدى. بۇگىنگى كۇنى تەكسەرىلگەن 160 مىڭ باس مالدىڭ 1475-ىندە برۋتسەللەز بەلگىلەرى انىقتالدى.