پاكىستاننىڭ اقپارات اگەنتتىگى مەن «قازاقپارات» ح ا ا ىنتىماقتاستىق مەموراندۋمىنا قول قويدى

قۇجاتقا قازاقستان تاراپىنان «قازاقپارات» ح ا ا باس ديرەكتورى اسقار ۋماروۆ، پاكىستان تاراپىنان APP باس ديرەكتورى ماسۋد مالىك قول قويدى.
قول قويۋ ءراسىمىنە قازاقپاراتتىڭ سەرىكتەستەرى - ەگيپەتتىڭ MENA اگەنتتىگى، رۋمىنيانىڭ AGERPRESS اگەنتتىگى، يراننىڭ IRNA اگەنتتىگى، افينا- ماكەدونيا جاڭالىقتار اگەنتتىگى وكىلدەرىنىڭ قاتىسۋىمەن، پاكىستان استاناسىنداعى اقپارات اگەنتتىكتەرىنىڭ حالىقارالىق كونفەرەنسياسى اياسىندا ۇيىمداستىرىلدى.
شاراعا، سونداي- اق قازاقستان رەسپۋبليكاسىنىڭ پاكىستان يسلام رەسپۋبليكاسىنداعى توتەنشە جانە وكىلەتتى ەلشىسى بارلىباي سادىقوۆ تا قاتىستى.
ىنتىماقتاستىق مەموراندۋمى «قازاقپارات» ح ا ا مەن APP اراسىنداعى ءوزارا سەرىكتەستىكتى ورناتۋعا، كاسىبي ىنتىماقتاستىقتى دامىتۋعا نەگىز قالاپ بەردى.
ايتا كەتەيىك، پاكىستان بۇقارالىق اقپارات قۇرالدارى قازاقستانعا، قازاقستاندىق ارىپتەستەرىنىڭ جۇمىسىنا قىزىعۋشىلىق تانىتىپ وتىر. اتاپ ايتقاندا، وتكەن اپتادا پاكىستاندىق ب ا ق وكىلدەرىنەن قۇرالعان توپ استاناعا باردى. ق ر اقپارات جانە كوممۋنيكاتسيالار مينيسترلىگىنىڭ ورتالىق كوممۋنيكاتسيالار قىزمەتىندە «مەديا سەرىكتەستىك: قازاقستان مەن پاكىستان» تاقىرىبىمەن وتكەن دوڭگەلەك ۇستەلدە تاراپتار ەكى ەل اراسىندا اقپارات، مادەني- گۋمانيتارلىق سالالارداعى ىنتىماقتاستىقتى دامىتۋ ماسەلەلەرىن تالقىلادى.