ۆلاديمير پۋتين نۇرسۇلتان نازاربايەۆ تۋرالى: ءاردايىم بولاشاققا ۇمتىلعان ادام

«شىنىمدى ايتسام، مەنى ءبىر قۋانتاتىنى جانە تاڭعالدىراتىنى، نۇرسۇلتان ءابىش ۇلى كەڭەس وداعى كەزىندە- اق وزىنە كەرەمەت مانساپ جاساپ الدى. بۇل مەنى ءالى كۇنگە دەيىن تاڭعالدىرادى. كەڭەستىك داۋىرگە قاراماستان، ول - ءاردايىم بولاشاققا ۇمتىلعان ادام. بۇل ونىڭ ەرەكشە قاسيەتى»، - دەپ اتاپ ءوتتى ۆلاديمير پۋتين.
رەسەي پرەزيدەنتى نۇرسۇلتان نازاربايەۆتىڭ مىقتى كوماندا جيناي الاتىندىعىن جانە جۇمىسىن ءتيىمدى ۇيىمداستىرا بىلەتىندىگىن اتاپ ءوتتى.
«بىرىنشىدەن، ول اينالاسىنا وتە ىسكەر جانە قابىلەتتى ادامداردى، جاستاردى جيناي بىلەدى جانە ءوز جانىنا مىقتى ادامداردى توپتاستىرۋدان قورىقپايدى. بۇل كەز كەلگەن مىقتى باسشىنىڭ ەرەكشە قاسيەتى. مىنە، نۇرسۇلتان ءابىش ۇلى نازاربايەۆ وسىنداي پاراساتتى، جىگەرلى، بەلسەندى جانە دارىندى باسشى، كوشباسشى»، - دەپ اتاپ ءوتتى ۆلاديمير پۋتين.
بۇدان بۇرىن حابارلانعانداي، مەملەكەت باسشىسى نۇرسۇلتان نازاربايەۆتىڭ رەسەيگە ساپارى قارساڭىندا ق ر پرەزيدەنتىنىڭ تەلەراديوكەشەنىنىڭ شىعارماشىلىق توبى سوچيگە بارىپ، الداعى ۋاقىتتا جارىق كورەتىن دەرەكتى فيلمنىڭ ءتۇسىرىلىم جۇمىستارىن جۇرگىزدى. ەرلان بەكحوجين اتالعان فيلمگە وراي رەسەي پرەزيدەنتى ۆلاديمير پۋتيننەن سۇحبات الدى جانە ءوزىنىڭ «ۇلكەن ساياسات سىرتىنداعى اڭگىمەلەر» اتتى كىتابىن سىيعا تارتتى.