روۋحاني: ا ق ش يادرولىق كەلىسىمنەن شىقسا وپىق جەيدى

«ترامپتىڭ يادرولىق كەلىسىم بويىنشا كەز- كەلگەن شەشىمىنە قارسى تۇراتىن جوسپارىمىز بار، - دەگەن روۋحاني بۇگىن يران مەملەكەتتىك تەلەارناسى ەفيرىنەن بەرىلگەن سوزىندە. - ەگەر امەريكا يادرولىق كەلىسىمنەن شىعاتىن بولسا، ونىسى كوپ ۇزاماي تاريحي وكىنىشكە ۇرىندىرادى».
روۋحاني ەگەر ا ق ش يادرولىق كەلىسىمنەن باس تارتسا يران قانداي جاۋاپ قاتاتىنى تۋرالى اشىپ ايتپادى. سونىمەن بىرگە ول ترامپتىڭ قانداي شەشىم قابىلدارىن توسا وتىرىپ، يراننىڭ اتوم ەنەرگياسى جونىندەگى ۇيىمىنا «قاجەتتى بۇيرىقتار» بەرگەنى تۋرالى حابارلادى. ترامپ بۇعان دەيىن ەگەر ەۋروپالىق وداقتاستار يادرولىق كەلىسىمنىڭ «سۇمدىق كەمشىلىكتەرىن» مامىردىڭ 12-ىنە دەيىن جويمايتىن بولسا، ا ق ش بۇل كەلىسىمنەن شىعادى دەپ بىرنەشە رەت مالىمدەگەن.
2015 -جىلى شىلدەدە يران مەن التى مەملەكەت - ا ق ش، گەرمانيا، قىتاي، ۇلى بريتانيا، رەسەي جانە فرانسيا اراسىندا قول قويىلعان كەلىسىم بويىنشا، تەگەران يادرولىق باعدارلاماسىن شەكتەيتىن بولسا يرانعا سالىنعان حالىقارالىق سانكسيالاردى جۇمسارتۋ كوزدەلگەن ەدى. ءبىراق 2016 -جىلى ا ق ش پرەزيدەنتى بولىپ سايلانعان ترامپ يرانمەن جاسالعان كەلىسىم شارتتارىن قاتايتۋ قاجەت دەپ بىلەدى.
گەرمانيا، فرانسيا، رەسەي، قىتاي مەن ۇلى بريتانيا ۆاشينگتوندى بىرلەسىپ قول قويعان كەلىسىمنەن شىقپاۋعا شاقىرعان. بۇل بەس مەملەكەت كەلىسىمدى يراننىڭ يادرولىق قارۋ يەمدەنۋ نيەتىنە بوگەت قويۋدىڭ ەڭ وڭتايلى ءتاسىلى دەپ سانايدى.
www.azattyq.org