فۋتبول: «استانا» بيىلعى ماۋسىمدا العاش رەت جەڭىلىس تاپتى

استانا. قازاقپارات - بۇگىن فۋتبولدان ەل بىرىنشىلىگىنىڭ سەگىزىنشى تۋرىندا قوس بىردەي كۇتپەگەن ناتيجە تىركەلدى، دەپ حابارلايدى قازاقپارات ءتىلشىسى.

تەمىرتاۋدا قاراعاندىنىڭ «شاحتەرى» وسىعان دەيىن جەڭىلمەي كەلە جاتقان «استانانى» قابىلدادى.

بۇل ويىننىڭ تاعدىرىن ءبىر عانا گول شەشتى. 70-مينۋتتا قاقپانىڭ جاقتاۋىنا ءتيىپ، كەرى سەرپىلگەن دوپتى توقتاتىپ، قايتا تەپكەن «شاحتەردىڭ» قۇرامىنداعى چەرنوگوريالىق لەگيونەر دامير كوياشيەۆيچ ءوز مۇمكىندىگىن پايدالانا ءبىلدى. ءبىر قىزىعى، د. كوياشيەۆيا كەزىندە «استانا» قۇرامىندا ويناعان بولاتىن. ءسويتىپ بۇرىنعى كلۋبىنان وسىلايشا «ءوش الدى».

«استانانىڭ» ءسۇرىنۋى مۇڭ ەكەن، تۋرنير كەستەسىندە ەلوردالىقتاردى وكشەلەپ كەلە جاتقان الماتىنىڭ «قايراتى» مۇنى ءمۇلت جىبەرگەن جوق. الماتىلىقتار تالدىقورعاندا جەرگىلىكتى «جەتىسۋ» كومانداسىن 3:1 ەسەبىمەن تىزە بۇكتىردى. بيىلعى چەمپيوناتتاعى التىنشى جەڭىسىن تويلاعان «قايرات» 20 ۇپايمەن كوش باسىنداعى «استاناعا» جاقىنداي ءتۇستى. ەلوردالىقتاردىڭ قورجىنىندا 22 ۇپاي بولعانىمەن، ولار ءبىر ويىندى ارتىق وتكىزدى. دەمەك، چەمپيوندىق اتاق ءۇشىن تالاس قىزا ءتۇستى دەگەن ءسوز.

تاعى ءبىر كۇتپەگەن ناتيجە «توبىل» (قوستاناي) مەن «قايسار» ( قىزىلوردا) كوماندالارى اراسىندا تىركەلدى. وسىعان دەيىن ءۇشىنشى ورىندا كەلە جاتقان، بيىل ەۋروپا ليگاسىنا جولداما العان قوستانايلىقتار ءوز الاڭىندا قىزىلوردالىقتاردان (0:3) ويسىراي جەڭىلىپ، جانكۇيەرلەرىنىڭ الدىندا جەرگە قارادى.

 ەسەسىنە شىمكەنتتە پاۆلوداردىڭ «ەرتىسىن» 1:0 ەسەبىمەن ۇتقان «ورداباسى» كومانداسى 16 ۇپايمەن ۇزدىك ۇشتىككە قايتا ورالدى. ءتورتىنشى، بەسىنشى ساتىداعى «توبىل» مەن «شاحتەردىڭ» 13-تەن ۇپايلارى بار.

بۇل تۋردا «اتىراۋ» مەن «اقتوبە» كوماندالارى 1:1 ەسەبىمەن تەڭ تارقاسسا، پەتروپاۆلدىڭ « قىزىلجارى» ءوز الاڭىندا «اقجايىقتى» (2:1) ۇتتى.

اۆتور: ەلجان ەرالى