ساكەن سەيفۋللين. «جۇباتۋ» - اڭگىمە
كۇنشىعىستان ەسكەن مايدا قوڭىر جەل وزەن بويىنداعى قالىڭ تالداردىڭ، بۇتالاردىڭ، شوپتەردىڭ باستارىن تەڭسەلتىپ، اقىرىن ىزىڭداپ تۇر. كورىنبەي اقىرىن ءجۇرىپ، جۇمساق سىپسىڭداعان جۇيرىك جەل مەن تۇنەرگەن تالداردىڭ جاپىراقتارى قالتىراسىپ، اقىرىن- اقىرىن سىبىرلاسىپ، سىرلاسقانداي. وسى قاراڭعى تۇندە مايدا قوڭىر جەلدىڭ جاياۋلاعان جۇمساق قوڭىر سارىنىنان باسقا، بۇتالاردىڭ اقىرىن ىزىڭداعان باياۋ ءۇندى، مۇڭدى كۇيىنەن باسقا، تال جاپىراقتارىنىڭ جات ءتىلدى سىرلى سىبىرلارىنان باسقا، الدىڭعى اۋىلدان اقىرىن، نازىك سىڭسىعان ءبىر ىزىڭ ەستىلەدى. سىڭسىعان ىزىڭ جۇرەكتىڭ ەڭ نازىك سەزىمدى كۇيلەرىن قوزعاپ، ءۇزىلىپ- ءۇزىلىپ، وكسىپ- وكسىپ ەستىلەدى.
ەرىكسىز تىڭداپ، قۇلاعىمدى سالا، ىزىڭعا قاراي ءجۇردىم. تاياۋىراق تىڭداعاندا، ىزىڭنان كوكىرەكتى قارس ايىرعان جاسىرىن كۇيىنىش، اشى قاسىرەت ەستىلەدى. مۇڭدى، قايعىلى زار ەستىلەدى.
تۇنەرگەن، مەڭىرەۋ قارا تۇندە ءاربىر جان ۇيقى، تىنىشتىق قۇشاعىندا جاتقاندا، بۇل نەندەي سىزىلعان مۇڭدى ىزىڭ ەكەن؟ بۇل ىزىڭ نەگە جۇرەكتىڭ مۇڭدى نازىك تامىرىنا تيەدى؟ نەلىكتەن جۇرەك بۇل ۇنمەن بىرگە ەلجىرەپ الىپ ۇشادى؟ ىزىڭ الىستان نازىك سىزىلىپ ءۇزىلىپ-ءۇزىلىپ سارنايدى.
سورلى انا ما بۇل ەلدە
قاراعىنان ايىرىلعان.
قاراڭعى تۇندە ەڭىرەگەن
قۋلىق بيە بولا ما،
قۇلىنىنان ايرىلىپ،
قۇلىنىن ىزدەپ زارلاعان؟
اڭ با ەكەن الدە وق ءتيىپ،
جانتالاسىپ سارناعان؟..
تايانعان سايىن سىڭسىعان ىزىڭ انىعىراق شىعادى، تايانعان سايىن جۇرەك ەلجىرەپ وكسيدى. . دەمىگىپ كەلسەم، وزەننىڭ جاعاسىندا ءبىر ءتۇپ تالدىڭ نە كوزىنىڭ جاسىن كول قىلىپ ەگىلىپ، زار جىلاپ وتىرعان ءمۇسليما ەكەن...
- قارىنداسىم، نەگە جىلادىڭ؟ نە بولدى ساعان، مۇڭدى قارىنداسىم، نەگە جىلادىڭ؟ نەگە ەگىلىپ، ىستىق جاسىڭدى توگەسىڭ؟ اي، مۇڭدى زارلى قارىنداسىم، تۋىسقان باۋىرىم! مەڭىرەۋ داۋىسىڭدى ەستىپ كەلدىم! كۇيىنىش قاسىرەتىڭدى قاسىرەت ىزىڭداعان جىلاۋىڭ ماعان دا قايعىلى جۇرەگىمدى ەلجىرەتىپ قوزعادى. كوزىمە ىستىق- ىستىق جاس ەمەس، سەندەي شەرلى، مۇڭدى، كوزىنىڭ جاسىن بۇلاعان قازاق قىزى كوپ! سەندەي قاباعى، باقىتى اشىلماعان، قازاق قىزى كوپ. ولار دا جىلايدى. مۇمكىن سەنەن دە كوبىرەك جىلايتىندار بار شىعار.
مەن بىلەمىن قاۋساعان شالدىڭ قۇلدىعىندا، كۇڭدىگىندە ءجۇرىپ سارعايعان قازاق قىزىن. مەن بىلەمىن ناداننىڭ حايۋان ءناپسىسى ءۇشىن ەكى، ءۇش قاتىننىڭ ءبىرى بولىپ قىسپاقتا جىلاپ جۇرگەن قازاق قىزىن. مەن بىلەمىن شىن ماحابباتپەن سۇيگەن عاشىعىنا قوسىلا الماي سارعايىپ، «ۋھ...» دەگەندە كوكىرەگى قارس ايرىلىپ جۇرگەن قازاق قىزىن.
قارىنداسىم، شەرلى قارىنداسىم، ءمۇسليماجان! جىلاما، تىي كوزىڭنىڭ جاسىن. وتەر قايعىلى قارا ءتۇن! مىنە، راۋانداعان تاڭ بەلگىسى. اشىلار باقىتىڭ. زۇلمات قارا ءتۇندى قۋىپ، جارقىراپ تاڭ اتار! دۇنيەگە التىن كۇن شىعار! مىنە، اقىرىنداپ ەسكەن، بەتتەن سۇيگەن مايدا نۇرىن شاشىپ، جەر- كوكتى شاتتاندىرىپ قارسى الدىڭنان كۇن شىعار! مىنە، اقىرىنداپ ەسكەن، بەتتەن سۇيگەن مايدا جەل. بۇل - تاڭ حابارشىسى!
بۇل - باقىت حابارشىسى. مىنە، جارقىراپ اتىپ كەلە جاتقان ەرىك تاڭى... مىنە، بۇل باقىت تاڭى، قارا الدىڭا، كۇتىپ ال باقىتىڭدى.
