12:40, 03 - مامىر 2018 | GMT +5
دانيار ەلەۋسىنوۆتىڭ كەلەسى جەكپە-جەگى قاشان وتەتىنى بەلگىلى بولدى
استانا. قازاقپارات - قازاقستاندىق كاسىپقوي بوكسشى دانيار ەلەۋسىنوۆتىڭ كەلەسى جەكپە-جەگى 6- ماۋسىمدا لوندوندا وتەتىن بولدى، دەپ حابارلايدى قازاقپارات ءتىلشىسى.
«مەنىڭ كەلەسى جەكپە-جەگىم لوندون قالاسىندا 6- ماۋسىمدا يورك حولدا وتەدى. بۇل مەنىڭ ۇلى بريتانياداعى دەبيۋتتىك كەزدەسۋىم بولادى»، - دەپ جازدى بوكسشى ءوزىنىڭ ينستاگرام پاراقشاسىندا.
ەسكە سالا كەتسەك، 29- ساۋىردە دانيار ەلەۋسىنوۆ كاسىبي بوكستاعى العاشقى جەڭىسىنە قول جەتكىزگەن بولاتىن. ونىڭ امەريكالىق بوكسشى نوا كيددپەن جەكپە-جەگى دەنيەل دجەيكوبس پەن ماتسەي سۋلەتسكي اراسىنداعى ايقاستىڭ اندەركارتىندا نيۋ-يوركتەگى Barclays Center ارەناسىندا ءوتتى. التى راۋندقا ەسەپتەلگەن جەكپە-جەكتىڭ ءۇشىنشى كەزەڭىندە قازاقستاندىق بوكسشى تەحنيكالىق نوكاۋتپەن جەڭىسكە جەتتى. ءسويتىپ دانيار ءوزىنىڭ كاسىبي بوكستاعى العاشقى جەڭىسىن تويلاعان ەدى.
اتالعان كەزدەسۋدەن كەيىن ەلەۋسىنوۆ كاسىبي بوكسشىلاردىڭ الەمدىك رەيتينگىنە كىردى.
