زەرەندىدە الىپ دەنەلى قوساعالى باتىردىڭ مازارى بار
بۇل تۋرالى قازاقپارات تىلشىسىنە اقمولا وبلىستىق تاريحي- مادەني مۇرانى قورعاۋ جانە پايدالانۋ ورتالىعىنىڭ باس ينسپەكتورى سەرىك ىسقاقوۆ ايتىپ بەردى.
سەرىك ىسقاقوۆتىڭ ايتۋىنا قاراعاندا، كوكشەتاۋ ءوڭىرىنىڭ تۋماسى باتىر ورتا ءجۇزدىڭ حانى ءۋاليدىڭ زامانىندا ءومىر سۇرگەن.
«قازاقتىڭ بەلگىلى كۇيشىسى داۋلەتكەرەي وعان ءوزىنىڭ «قوساعالى» اتتى كۇيىن ارناسا، اقمولا- كوكشە ايماعىندا ونىڭ اتىمەن اتالاتىن جەر، سۋ اتاۋلارى دا كەزدەسەدى. قوساعالى باتىر زيراتى باسىنا جەر- جەردەن ءتاۋ ەتىپ كەلۋشىلەردىڭ دە قاراسى مول. قازىرگى تاڭدا، قوساعالى باتىرعا مازار تۇرعىزىلدى. اتالعان جەر جەرگىلىكتى ادامدار مەن وبلىس قوناقتارى ءۇشىن كيەلى ورىنداردىڭ ءبىرى بولىپ سانالادى»، - دەيدى س. ىسقاقوۆ.
قوساعالى باتىر بويى - 276 س م الىپ دەنەلى باتىر بولعان. ونىڭ جەرلەۋ ورنى-4 مەتردى قۇرايدى. ماڭدايشاسىنداعى جازۋلار ارابشا جازىلعان، قابىر باسىنداعى جازۋى قازاق جانە ورىس تىلىندە «رۋى جاقسىلىق قاراۋىل»، «بوگاتىر قوساعالى تولەكوۆ» دەپ جازىلعان.
شاعالالى وزەنىنىڭ تاۋدى اينالىپ وتەتىن تۇسىندا جاقسىلىق قاراۋىلعا جاتاتىن «ساي» اۋىلىنان تاراعان «جالعىز قاراعاي»، «قىرداعى اۋىل»، «بىلقىلداق»، «تالداعى اۋىل»، «وزەن قاراعاي» دەيتىن اۋىلداردى قوساعالى باتىر جۇرتى مەكەندەگەن.
قوساعالى باتىر ارعىن رۋى قاراۋىلدىڭ جاقسىلىق تارماعىنان تارايتىن بايان ۇلى بايتولەكتىڭ بالاسى.
تانىمال جۋرناليست- جازۋشى تورتاي سادۋاقاسوۆتىڭ 2004 -جىلى جارىق كورگەن «ەل مەن جەر» كىتابىنداعى شەجىرەدە: قاراۋىلدان تومەن ماشەك اتاسىنان - ەسەنباي- الىمبەت- جاقسىلىق- بايان- تولەك- قوساعالى- بايبول- كۇلەس- ءجاۋلا- ەسقاق- قابدوللا بولىپ ۇرپاقتارى دەپ كورسەتىلگەن. باتىردىڭ اكەسى تولەكتىڭ توعىز مىڭ جىلقىسى بولىپتى.
1723-1730 -جىلدارداعى «اقتابان شۇبىرىندىدا» جاداپ- جۇدەپ وسى جاققا جەتكەن قانداستارىمىزعا مال، جەر بەرىپ كومەك كورسەتكەن اتىمتاي جومارتتىعىنا ساي ەل- جۇرت ونى بايان ۇلى باي- تولەك اتاپ كەتكەن- ءمىس.
قوساعالىنى ءوز تۇسىندا ومبى شەكپەندىلەرىنىڭ شەنەۋنىكتەرى، تاتار بايلارى دا تانىپ، سىيلاسىپ، ونىمەن ساناسقان. وعان ومبى گۋبەرناتورى «التىن تون» اتالاتىن وقالى شاپانىن تارتۋ ەتكەن. بۇل جادىگەر جۇرناعى كۇنى كەشەگە دەيىن باتىردىڭ ۇرپاعى داكەن بوقانوۆ اقساقالدىڭ ۇيىندە ساقتالىپ كەلگەن.
اۆتور: اسلان وسپانوۆ
