قىتايدا وتەتىن ش ى ۇ ءسامميتى تاريحي ماڭىزعا يە بولادى
وسىنداي پىكىردى ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ (KAZISS) ديرەكتورى زارەما شاۋكەنوۆا ايتتى، دەپ حابارلايدى قازاقپارات ءتىلشىسى.
«شانحاي ىنتىماقتاستىق ۇيىمى قارقىندى دامىپ كەلە جاتقان حالىقارالىق بىرلەستىك. 2017 -جىلعى ماۋسىمدا استاناداعى سامميتتە ش ى ۇ قاتارىنا ءۇندىستان مەن پاكىستاننىڭ قوسىلۋى ورتالىق جانە وڭتۇستىك ازيا وڭىرلەرى اراسىندا ەكونوميكالىق ىنتىماقتاستىقتى نىعايتۋعا تىڭ سەرپىن بەردى. قازىرگى ۋاقىتتا ءوزارا ءىس- قيمىلدا باسىمدىقتى باعىت رەتىندە ەنەرگەتيكالىق سەكتوردى، كولىك ينفراقۇرىلىمىن بىرلەسە دامىتۋ بەلگىلەنگەن. سونىمەن قاتار، تاۋارلار مەن كاپيتالدىڭ ءارى تەحنولوگيانىڭ ەركىن قوزعالىسىن قامتاماسىز ەتۋگە ەرەكشە نازار اۋدارىلۋدا. مەنىڭ ويىمشا، 2018 -جىلدىڭ ماۋسىمىندا تسينداودا جوسپارلانعان ش ى ۇ مەملەكەت باسشىلارى ءسامميتى تاريحي جيىن بولادى. سەبەبى ونىڭ جۇمىسىنا الەم حالىقتارىنىڭ جارتىسىنان استامىن بىرىكتىرىپ وتىرعان «سەگىزدىك» وكىلدەرى قاتىسادى. بۇل ەلدەر 2020 -جىلعا قاراي الەمدىك جالپى ىشكى ءونىمنىڭ 35 پايىزىن قامتاماسىز ەتەدى دەپ كۇتىلۋدە» ، - دەپ توقتالدى ساراپشى.
وسى ورايدا، ول قازىرگى كەزدە اتالعان شاراعا دايىندىق جۇمىستارى بەلسەندى ءجۇرىپ جاتقانىن اتاپ ءوتتى. 24 - ساۋىردە شانحاي ىنتىماقتاستىق ۇيىمىنا مۇشە مەملەكەتتەردىڭ سىرتقى ىستەر مينيسترلەر كەڭەسى وتىرىسىنىڭ قورىتىندىسى بويىنشا 14 قۇجاتتىڭ جوباسى بەكىتىلدى. ول قۇجاتتارعا ش ى ۇ- عا مۇشە ەلدەر باسشىلارىنىڭ سامميتىندە قول قويىلۋى ءتيىس.
«ولاردىڭ اراسىندا 2019-2021 -جىلدارعا ارنالعان تەرروريزم، سەپاراتيزم جانە ەكسترەميزممەن كۇرەس سالالارىنداعى ىنتىماقتاستىق باعدارلاماسىنىڭ ماڭىزدىلىعى ەرەكشە. قۇجات ۇيىم قىزمەتىنىڭ ىرگەلى باعىتتارىن ەسكەرىپ وتىر. اتاپ ايتساق، بيىل ۇيىم تاريحىندا العاش رەت شيڭداودا ايەلدەر ءسامميتى مەن ش ى ۇ بۇقارالىق اقپارات قۇرالدارى ءسامميتى وتەدى. گەندەرلىك ساياسات پەن مەديا سالاعا دەگەن قىزىعۋشىلىق ۇيىمنىڭ قارقىندى دامىپ كەلە جاتقانىن اڭعارتادى» ، - دەدى ز. شاۋكەنوۆا.
بۇدان بولەك، ول سامميت اياسىندا ق ر پرەزيدەنتى نۇرسۇلتان نازاربايەۆتىڭ قىتايعا ساپارىنا دايىندىق شارالارىنا ەرەكشە ءمان بەرىلىپ وتىرعانىن ءسوز ەتتى.
بۇدان بۇرىن حابارلانعانداي، شانحاي ىنتىماقتاستىق ۇيىمىنا مۇشە مەملەكەتتەردىڭ سىرتقى ىستەر مينيسترلەر كەڭەسى وتىرىسىنىڭ قورىتىندىسى بويىنشا 14 قۇجاتتىڭ جوباسى قارالدى.
تاراپتار 2019-2021 -جىلدارعا ارنالعان تەرروريزم، سەپاراتيزم جانە ەكسترەميزممەن كۇرەس سالالارىنداعى، سونداي- اق ش ى ۇ مۇشە مەملەكەتتەردىڭ ۇزاق مەرزىمگە تاتۋ كورشىلىگى، دوستىعى جانە ىنتىماقتاستىعى جونىندەگى كەلىسىم ەرەجەلەرىن 2018-2022 -جىلدارى ىسكە اسىرۋ، 2018-2022 -جىلدارعا ارنالعان ۇيىمعا مۇشە ەلدەردىڭ يۋنەسكو- مەن ءوزارا ارەكەتتەستىگى، قورشاعان ورتانى قورعاۋ جانە ىندەت قاۋىپتەرىنە قارسى ارەكەت ەتۋ جونىندەگى ىنتىماقتاستىق كونتسەپتسياسى بويىنشا قۇجاتتار جوبالارىن كەلىسىمدەدى.
