ايدار شارىبايەۆ: مەن ءۇشىن جەڭىلىس دەگەن ۇعىم جوق
- ايدار، قازىرگى ۋاقىتتا ءسىزدىڭ فيزيكالىق تۇرعىداعى جاعدايىڭىز قالاي؟
- راحمەت. اقىرىنداپ قالىپقا كەلە باستادىم.
- ەكى راۋندتان كەيىن قارسىلاستان مۇنداي سەرپىندى كۇتپەگەن سەكىلدىسىز...
- كۇتتىم. جالپى، مەن ءۇشىن ونىڭ شارشى الاڭدا جەتەكشىلىك ەتۋى توسىنسىي بولعان جوق. ول تاجىريبەلى بوكسشى. ءوزىم وسىنشا ءالسىزبىن دەپ ويلاماپپىن. بالكىم، ايقاس الدىندا سالماق قۋىپ، ول ءۇردىستى دۇرىس جۇرگىزبەگەن سەكىلدىمىن. ال جالپى ايقاستىڭ قورىتىندىسىن ەسەپتەمەگەندە ءبارى دە جوسپار بويىنشا جۇرگىزىلدى.
- ءسىزدىڭ ويىڭىزشا، ەندريۋ كانچيو نەلىكتەن باسىم ءتۇستى؟
- بىلمەيمىن. بالكىم، قارسىلاس ءوزىنىڭ سالماق دارەجەسىندە ونەر كورسەتكەنىنەن بولار. دەسە دە، مەن ءىستىڭ ءبارى قارسىلاستىڭ كۇشتى بولىپ شىققانىنا بايلانىستى بولدى دەپ ەسەپتەيمىن. بۇل جولى مەن السىزدىك تانىتتىم.
- العاشقى ساتسىزدىكتەن كەيىن قانداي قورىتىندىعا كەلدىڭىز؟
- شىنىمدى ايتسام، كوپتەگەن قورىتىندى جاسادىم. اسىعىستىق تانىتپاۋمەن بىرگە شەكتەن تىس جايباسار بولىپ كەتپەۋ كەرەك دەگەن شەشىمگە كەلدىم. ايقاس قابىلەتىنىڭ بەل ورتاسىن تابا ءبىلۋ دە شەبەرىك. تەحنيكالىق تۇرعىدا ءبىراز وي ءتۇيدىم. كوبىنەسە دەتالدارعا نازار اۋدارۋ قاجەتتىلىگىن ءتۇسىندىم. اكەم ايتپاقشى: «ۇساق كەمشىلىكتەر جوق جەردە، ءىرى كەمشىلىكتەرگە ورىن جوق».
- ەندىگى كەزەكتە نە جوسپارلاپ وتىرسىز؟
- جوسپار كوپ. ءوزىمنىڭ باستى ماقساتىم - الەم چەمپيونى تيتۋلىنا قاراي قوزعالا بەرەمىن. ۇمتىلىس تا، ەنتۋزيازم دا باسەڭدەپ قالعان جوق. شىنىمدى ايتسام، ءتىپتى ۇمتىلىسىم ارتا ءتۇستى. جاتپاي-تۇرماي ەڭبەكتەنەتىن بولامىز. ءوزىمىزدىڭ بوكستان وتاندىق باپكەرلەرىمىزبەن جۇمىس ىستەگىم كەلەدى. جالپى، مەن ءۇشىن «جەڭىلىس» دەگەن ۇعىم جوق، «ساباق» دەگەن تۇسىنىك بار. بولاشاقتا كەرەك بولار كوپتەگەن وي-پايىمداردى ساناما ءتۇيىپ الدىم. ەندى العا قاراي جىلجي بەرەمىن.
ەسكە سالا كەتسەك، وسى ايدىڭ 12-دە ينديودا ايدار شارىبايەۆ (7-1، 6 ك و) ا ق ش وكىلى ەندريۋ كانچيومەن (18-4-2، 14 ك و) تيتۋلدىق جەكپە- جەگىن وتكىزگەن بولاتىن. بوكسشىلار ەكىنشى جارتىلاي جەڭىل سالماقتاعى WBA InterContinental بەلدىگى ءۇشىن كۇش سىناسقان ەدى. جەرلەسىمىز جەكپە-جەكتى قارقىندى باستادى. الايدا ءۇشىنشى، بەسىنشى راۋندتاردا نوكداۋنعا ءتۇسىپ قالدى. سوڭعى ونىنشى راۋندتا تورەشى جەكپە-جەكتى توقتاتىپ، شارىبايەۆقا تەحنيكالىق نوكاۋت جاريالادى. بۇل قازاقستاندىق بىلعارى قولعاپ شەبەرىنىڭ 58,967 كيلوگرامعا دەيىنگى سالماق ساناتىنداعى دەبيۋتى ءارى كاسىپقوي بوكستاعى العاشقى جەڭىلىسى بولدى.
بۇعان دەيىنگى 7 كەزدەسۋدىڭ بارلىعىن دا ايدار جەڭىسپەن اياقتاعان.
اۆتورى ايان بەكەن ۇلى
