قازاقستاندىق «نيك ۆۋيچيچ» مارادوناعا شاپان سىيلادى
«الەمدىك فۋتبول جۇلدىزى مەنىڭ ۇلىمدى ءوز نەمەرەسىندەي قۇشاقتاپ، باۋىرىنا باستى. بۇل سەزىمدى سوزبەن ايتىپ جەتكىزە المايمىن، قۋانىشتان جىلاپ وتىرمىن! بارلىعى ءتاتتى تۇستەي بولدى. ءالي قاقپاشى بولىپ، دوپتى قاعىپ العاندا جانە پاس بەرگەندە ديەگو تاڭدانىسىن جاسىرمادى»، - دەپ جازدى ءاليدىڭ اناسى اقمارال امىرەيەۆا Instagram پاراقشاسىنا.
ونىڭ ايتۋىنشا، تانىمال فۋتبولشىمەن كەزدەسۋگە وتباسى الدىن الا دايىندالعان جانە سىيلىق رەتىندە ۇلتتىق شاپان ساتىپ العان.
«بۇل كەزدەسۋ الدىن الا جوسپارلانعان بولاتىن جانە ءبىز مارادوناعا اسا قۇرمەتتى ادامدارعا سىيلاناتىن ۇلتتىق شاپان سىيلادىق. ءوز كەزەگىندە، مارادونا اليگە جەيدە سىيلاپ، وعان قولتاڭباسىن قويدى. بۇل ءاليدىڭ ەڭ ۇلكەن ارمانى ەدى - دوپ نەمەسە جەيدە السام ەكەن دەپ تىلەدى. اقىرىندا دوپتى دا، جەيدەنى دە الدى»، - دەدى اقمارال قازاقپارات تىلشىسىنە تەلەفون ارقىلى بەرگەن سۇحباتىندا.
سونداي- اق، ا. امىرەيەۆا ۇلىنىڭ ءتۇرلى كەدەرگىلەرگە تاپ بولاتىنىن دا جاسىرمادى جانە ەرەكشە بالالارعا ارنالعان ارنايى سپورت ۇيىرمەلەرىن اشۋدى ۇسىندى.
«ءاليدى ءبىرقاتار فۋتبول ۇيىرمەلەرى قابىلدامادى. ونىڭ دەنساۋلىعىنان قاۋىپتەنگەن بولار. مۇنداي بالالار قاراپايىم ۇيىرمەلەرگە قابىلدانباسا، ارنايى ۇيىرمەلەر اشسىن. ولاردىڭ سپورتقا دەگەن قۇلشىنىسىن وشىرمەۋىمىز كەرەك. كەرىسىنشە، ينكليۋزيۆتى ءتاسىلدى دامىتا ءتۇسۋ قاجەت»، - دەدى ءاليدىڭ اناسى.
ايتا كەتەيىك، بۇعان دەيىن ءالي تۇرعانبايەۆ ءوز كۋميرى، بەلگىلى وراتور نيك ۆۋيچيچپەن كەزدەستى. نيك ۆۋيچيچ قازاقستانداعى وسىنداي بالالاردىڭ اتا- انالارىنىڭ بىرىگۋى كەرەكتىگىن ايتىپ، وعان قال- قادىرىنشە كومەك كورسەتەتىندىگىن ايتتى.
اۆتور: ايجان سەرىكجان قىزى
