وزبەك تىلىندەگى اباي قۇنانبايەۆتىڭ كىتابى استاناداعى كىتاپ جارمەڭكەسىندە تانىستىرىلادى
بۇل جايىندا بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا «ەۋرازيالىق حالىقارالىق كىتاپ كورمە- جارمەڭكەسى» جوباسىنىڭ جەتەكشىسى راۋشان تۇرلىنوۆا ايتتى، دەپ حابارلايدى قازاقپارات.
ونىڭ اتاپ وتۋىنشە، كورمە- جارمەڭكەگە كەلەتىن دەلەگاتسيالار جەكەلەگەن، تولىققاندى باعدارلاما دا ۇسىناتىن بولادى.
«وزبەك دەلەگاتسياسى «ۇلى قازاق اقىنى ءارى ويشىلى اباي قۇنانبايەۆتىڭ شىعارماشىلىق مۇراسى» دەپ اتالاتىن كىتاپ ستەندىن دايىندادى. كورمەدەگى جارقىن شارالاردىڭ ءبىرى وزبەك تىلىنە اۋدارىلعان اباي قۇنانبايەۆ كىتابىنىڭ تۇساۋكەسەرى بولماق. قازىرگى ۋاقىتتا وزبەك حالقى اباي قۇنانبايەۆتى ورتا عاسىرداعى ۇلى تۇركى اقىنى ءارى فيلوسوفى ناۆويمەن سالىستىرادى. سوڭعى جىلدارى وزبەك حالقى ءبىزدىڭ مادەنيەتتەرىمىزدىڭ ءوزارا بايلانىسىنا باسا نازار اۋدارىپ وتىر. وزبەكستاندا ابايعا ەسكەرتكىش قويىلدى. اعىمداعى جىلى ولار كىتاپ كورمەسىن ۇيىمداستىرىپ، وندا ابايدىڭ شىعارمالارىن قويماق. سونىمەن قاتار قۇرمەتتى قوناق رەتىندە قازاقستاننان دا دەلەگاتسيا شاقىرۋعا نيەت تانىتۋدا» ، - دەدى راۋشان تۇرلىنوۆا.
ەستەرىڭىزگە سالا كەتەيىك، «Eurasian Book Fair - 2018» ІІІ ەۋرازيالىق حالىقارالىق كىتاپ كورمە- جارمەڭكەسى ءساۋىردىڭ 25-28 ارالىعىندا «كورمە» كورمە ورتالىعىندا جۇمىس ىستەيدى. بيىلعى كورمە قر مادەنيەت جانە سپورت مينيسترلىگى مەن استانا اكىمدىگىنىڭ قولداۋىمەن ەلوردانىڭ 20 جىلدىق مەرەيتويىنا ارنالعان.