ەگيپەتتە «قازاق ەلىنىڭ كلاسسيكاسى» اتتى كونسەرتى ءوتتى
باسپا ءسوز مالىمەتتەرىنە قاراعاندا اتالمىش كونسەرتتەر « رۋحاني جاڭعىرۋ» پرەزيدەنتتىك باعدارلاماسى شەڭبەرىندە، سونداي-اق قازاقستاننىڭ ەلورداسى - استانا قالاسىنىڭ 20 جىلدىق مەرەيتويىنا وراي كاير جانە الەكساندريا قالالارىنىڭ وپەرا تەاترلارىندا ق ر حالىق ءارتىسى، قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجايەۆانىڭ باسشىلىعىمەن ءوتتى. وركەسترگە ايگىلى ماەسترو ايدار تورىبايەۆ جەتەكشىلىك ەتتى.
قويىلىمداردى تاماشالاۋعا كوپتەگەن كورەرمەندەر كەلدى. قۇرمەتتى قوناقتاردىڭ اراسىندا قىزىل تەڭىز پروۆينسياسىنىڭ گۋبەرناتورى، قازاقستان دوستارى اسسوتسياتسياسىنىڭ ءتوراعاسى احمەد ابداللا، وڭتۇستىك سيناي پروۆينسياسىنىڭ گۋبەرناتورى حالەد فودا، الەكساندريا پروۆينتسياسىنىڭ گۋبەرناتورى مۇحاممەد سۇلتان، مىسىر مينيسترلىكتەرى مەن ۆەدومستۆولارىنىڭ باسشىلارى، شەتەلدەردىڭ ەلشىلەرى مەن ديپلوماتتارى كەلدى. ولار ءداستۇرلى جانە زاماناۋي مۋزىكالىق ونەردى قامتيتىن قازاق ۇلتتىق مادەنيەتىنىڭ قايتالانباس سينتەزىنە نازار اۋدارا وتىرىپ، قازاقستاندىق ارتىستەردىڭ كاسىبي دەڭگەيلەرىن جوعارى باعالادى.
مىسىرلىق كورەرمەندەردىڭ نازارىنا ۆاگنەردىڭ ۋۆەرتيۋراسى، نيۋربنەرگ مەيستەرزينگەر وپەراسى، پروكوفيەۆتىڭ ءبىرىنشى سكريپكا كونسەرتى، شۋبەرتتىڭ توعىزىنشى سيمفونياسى سياقتى الەمدىك كلاسسيكانىڭ الدىڭعى قاتارلى شىعارمالارى ۇسىنىلدى.
قازاقستاندىق جاس جانە تالانتتى كومپوزيتور، «قازاق موتسارتى» اتانعان راحات-بي ءابدىساعيننىڭ «رومانتيزم جاڭعىرىعى» اتتى شىعارماسى ەرەكشە قىزىعۋشىلىق تۋدىردى. سونىمەن قاتار، «شابىت» دومبىراشىلار انسامبلىنىڭ «اداي»، «ءالقيسسا» كۇيلەرىن اسقان شەبەرلىكپەن ورىنداۋى، «ايگولەك» سكريپكاشىلار انسامبلى، سونداي-اق انشىلەر باتىرجان سماكوۆ، اسقار مۇقيات، ۇلپان ابدىكارىموۆا، نازىم ساعىنتاي، مارات ايتىمبايدىڭ ونەرلەرى جۇرتشىلىقتى قۋانتتى.
قازاقستان حالىق ءارتىسى، يۋنەسكو-نىڭ بەيبىتشىلىك جونىندەگى ءارتىسى ايمان مۇساقوجايەۆانىڭ قالىڭ كوپشىلىكتى وزىنە ءتانتى ەتكەن ونەرى كونسەرتتىڭ ەرەكشە رەڭك بەردى. قالىڭ كوپشىلىك ورىندارىنان تۇرىپ قول سوعىپ، ۇزاق ۋاقىت قوشەمەت كورسەتتى.
وسى كۇندەرى قازاقستاننىڭ كايردەگى ەلشىلىگى ۇيىمداستىرعان ءىس- شارالارعا مىسىردا تۇراتىن وتانداستارىمىز جانە قازاقستاندىق ستۋدەنتتەر قاتىسىپ، تۋعان جەر اۋەندەرىن اڭساپ تىڭدادى. كونتسەرت سوڭىندا ولار ەلشىلىكتىڭ قىزمەتكەرلەرى مەن ارتىستەرىنە كەرەمەت ءىس- شارا ءۇشىن العىستارىن ءبىلدىردى. ولاردىڭ ايتۋىنشا، ەلباسىنىڭ «رۋحاني جاڭعىرۋ» باعدارلاماسى قازاقستاندىقتار ءۇشىن ۇلتتىق ونەرگە اتسالىسۋعا عانا ەمەس، شەتەلدىكتەردى وتانىمىزدىڭ كوپ قىرلى مادەنيەتىمەن تانىستىرۋعا دا ۇلكەن مۇمكىندىك بەرەدى.
جالپى العاندا، اتالعان ءىس- شارالار مىسىرداعى ونەرسۇيەر قاۋىمعا ۇمىتىلماس اسەر قالدىرىپ، ەكى ەل اراسىنداعى مادەني بايلانىستاردىڭ ودان ءارى دامۋىنا جانە ەكى دوستاس حالىقتىڭ جاقىنداسۋىنا سەرپىن بەردى.
