كولىكتى سات تا، قارىزىڭنان قۇتىل: توقتار اۋباكىروۆ بۇيرەگىن ساتام دەگەن جىگىتكە استىنداعى كولىگىن بەرە سالعان
«ەكى- ءۇش جىل بۇرىن ءبىر تانىسىم قارىزعا كىرىپ، ءبىراز قينالدى. قينالعانى سونشا، فرانكلين اتانىڭ سۋرەتى بار كوك قاعاز تابىلماعان سوڭ ءتىپتى، ءبىر بۇيرەگىن ساتپاقشى دا بولعان. ۇلكەنىمىز بار، كىشىمىز بار ءبارىمىز جابىلىپ ءجۇرىپ ول ويىنان اينىتتىق. سول تانىسىم ءبىر كۇنى ماعان كەلىپ، «توقتار اعانىڭ ۇيىنە بارىپ جاعدايدى ايتايىقشى، مەنى تانىماسا دا، سەنى تانىپ قالۋى مۇمكىن عوي» دەدى. جاقسى دەپ قاراعاندى تراسساسىنىڭ بويىنداعى توقتار اعانىڭ ءۇيىن تاۋىپ باردىق. جەر ءۇي ەكەن. عارىشكەر اعامىز اڭعا شىعۋعا قامدانىپ كەتەيىن دەپ تۇرعان شاعى سول ەكەن، ءبىزدى كورىپ جاعدايدى اسىقپاي تىڭدادى.
ءسويتتى دە، «ءىنىم بۇيرەگىمدى ساتام دەگەن ءسوزدى قوي، سەن سۇراعان اقشا مەندە دە جوق، ءما مىنا كولىكتى سات تا، قارىزىڭنان قۇتىل» دەپ تەمىر تۇلپارىنىڭ كىلتىن قولىمىزعا ۇستاتتى دا جىبەردى. بۇيرەگىن ساتام دەپ تۇرعان جىگىت تە، مەن دە جۇرەگىن جۇلىپ بەرەردەي باۋىرمالدىق تانىتقان اعامىزعا قاتتى ريزا بولدىق. قينالىپ، قاجىپ جۇرگەن پەندەگە جىلى ءسوزدىڭ ءوزى ۇلكەن جاردەم ەكەن عوي. تانىسىم ءجۇزى جايناپ، «جوق اعا! وسى ءىسىڭىزدىڭ ءوزى ماعان ۇلكەن قاجىر قايرات سىيلادى. بىز ءۇشىن ءسىز جاياۋ جۇرمەڭىز» دەپ كولىگىن وزىنە قايتاردى. مەن ازاماتتىق، مارتتىك، ادامگەرشىلىك پەن باۋىرمالدىق دەگەننىڭ شىنايى كورىنىسىن وسى كەزدە عانا كوردىم» ، - دەپ جازادى اقىن.
Stan.kz
