نۇرسۇلتان نازاربايەۆ تەرميندەرگە قاتىستى پىكىر ءبىلدىردى
العاشقى 18 كىتاپتىڭ شىعۋىمەن عىلىمي قازاق ءتىلىن دامىتۋدىڭ بىرەگەي قادامى جاسالدى، دەپ حابارلايدى قازاقپارات ءتىلشىسى.
«بۇل جولى امبەباپ عىلىمي تەرميندەردى وزگەرتپەي الۋ تۋرالى شەشىم قابىلداندى. ايتپەسە، تاۋەلسىزدىكتىڭ العاشقى جىلدارى شەتەل تىلىندەگى سوزدەردەن، اسىرەسە، ورىس تىلىندەگى سوزدەردەن اجىرايىق دەپ، نەشە ءتۇرلى اۋدارما جاسادىق قوي. كەيبىرەۋلەرىن ايتۋعا دا ۇيات. كەيبىر سوزدەر ءدال كەلدى، كەيبىرىن ايتەۋىر كەلسە بولدى دەپ، الا سالعان» ، - دەدى ن. نازاربايەۆ «100 جاڭا وقۋلىقتىڭ» العاشقى سەرياسىن تانىستىرۋ كەزىندە.
وسى ورايدا پرەزيدەنت «پروتسەنت» دەگەن ءسوزدىڭ اۋدارماسىمەن كەلىسپەيتىنىن تاعى دا جەتكىزدى. ن. نازاربايەۆتىڭ ويىنشا، اتالعان ءسوزدى سول كۇيىندە قولدانعان دۇرىس. مەملەكەت باسشىسى مارقۇم ەركەعالي راحماديەۆتىڭ «كومپوزيتور» - دى «سازگەر» دەپ العانىنا قارسىلىق بىلدىرگەنىن دە ەسكە الدى.
«كومپوزيتور دا، پيانينو دا دۇنيەجۇزىلىك ءسوز ەمەس پە؟ ونى «كۇيساندىق» دەپ اۋدارعاننان نە تابامىز. «ساندىق» دەگەن قازاق ءۇشىن مۇلدەم باسقا قۇرال. جالپى، ءسوزدى بايىتۋ ءۇشىن بارلىعىن اۋدارىپ الايىق دەگەن بولماۋى كەرەك. مىسالى، «بالمۇزداق» دەگەن وتە كەرەمەت ءسوز. سونداي بولۋى قاجەت. سوندىقتان عىلىمي تەرميندەردى اۋدارامىز دەپ، مىقشىندايتىن بولساق، وندا ءبارىن قۇرتىپ الامىز. ال دۇنيەجۇزىندە قولدانىلاتىن تەرميندەر قازاق تىلىنە ەنسە، وندا ءتىلىمىزدى بايىتادى، سانىن كوبەيتەدى. عىلىمي ءماتىننىڭ ماعىناسى بۇرمالانباي، بارىنشا تۇسىنىكتى بولۋى قاجەت» ، - دەيدى ن. نازاربايەۆ.
پرەزيدەنتتىڭ ايتۋىنشا، «100 جاڭا وقۋلىق» جوباسى اياسىندا اۋدارىلاتىن بارلىق كىتاپتار حالىققا قولجەتىمدى بولادى. سەبەبى ءبارى ءۇش فورماتتا، كادىمگىدەي كىتاپ تۇرىندە، سوسىن ونلاين ۇلگىسىندە شىعارىلادى. سونداي- اق، ۇزدىك لەكتورلاردىڭ اشىق دارىستەر ۆيدەوتەكاسىندا ساقتالادى. «لاتىن الىپبيىمەن ينتەرنەتكە شىققاندا ونى بارلىق ەلدەردەگى قازاق جاستارى وقي الادى» ، - دەپ اتاپ ءوتتى ن. نازاربايەۆ.
ايتا كەتەيىك، بۇگىن «100 جاڭا وقۋلىق» جوباسى اياسىندا العاشقى 18 كىتاپ پرەزيدەنتكە تانىستىرىلدى. سول كەزدە مەملەكەت باسشىسى ءدىني ءبىلىمنىڭ ماڭىزدىلىعىنا دا ەرەكشە توقتالدى. سونداي- اق، جەمقورلىقتىڭ قايدان باستالاتىنىن دا ايتتى.
