شەنەۋنىكپىن دەپ جۇرتتى الداعان قاراعاندىلىققا قاتىستى سوت ۇكىمى وزگەردى

قاراعاندى. قازاقپارات - قاراعاندى وبلىستىق سوتى ءوزىن لاۋازىمدى تۇلعا رەتىندە تانىستىرىپ تۇرعىنداردى الداعان باقىتجان مۇسايەۆقا قاتىستى سوت ۇكىمىن جەڭىلدەتتى، دەپ حابارلايدى قازاقپارات.

قاراعاندىلىق باقىتجان مۇسايەۆ ءوزىن ادىلەت ءمينيسترى، بىردە وبلىس اكىمىنىڭ ورىنباسارى رەتىندە تانىستىرىپ «جۇمىسقا تۇرعىزامىن» دەپ قاراعاندىلىقتاردى الداپ كەلگەن. الاياق تۇرعىنداردان وسىلايشا 15 مىڭ ا ق ش دوللار جيناعان. سونىمەن قاتار «جوعارى وقۋ ورنىندا سەسسيانى تاپسىرۋعا كومەكتەسەمىن» دەپ سىياقى العان.

باقىتجان مۇسايەۆ وڭتۇستىك قازاقستان وبلىسىنىڭ ءى ءى د كادرلىق جۇمىس جونىندەگى باسقارما باسشىسىنا ادىلەت ءمينيسترى رەتىندە قوڭىراۋ شالىپ، ىشكى ىستەر ورگانىنا جۇمىسقا قابىلداۋدا ىرىكتەۋدەن وتپەي قالعان قاراعاندىلىقتى جۇمىسقا الۋىن تالاپ ەتكەن. سونىمەن قاتار قاراعاندى وبلىسى اكىمىنىڭ ورىنباسارى رەتىندە جوعارعى وقۋ ورنىنىڭ رەكتورىنا قوڭىراۋ شالىپ ءبىر ستۋدەنتتىڭ سەسسيا جونىندەگى ماسەلەسى شەشىلسىن دەگەن ءوتىنىش بىلدىرگەن.

باقىتجان مۇسايەۆ 2017 -جىلدىڭ 12 -جەلتوقسانىندا قازىبەك ءبي اۋداندىق سوتىنىڭ ۇكىمىمەن ق ر ق ك- نىڭ 390-بابى 1-تارماعى بويىنشا ايىپتى دەپ تانىلىپ، 6 جىلعا باس بوستاندىعىنان ايرىلعان.

سونىمەن قاتار 120 ساعات قوعامدىق جۇمىسقا جەگىلىپ، مۇلكى تاركىلەنەتىن بولعان.

بۇگىندە وبلىستىق سوتتىڭ مالىمەتىنشە اپپەلياتسيالىق سوت ساتىسى بۇل ۇكىمگە وزگەرتۋ ەنگىزگەن. ياعني باقىتجان مۇسايەۆتىڭ جەكە مۇلكى تاركىلەنبەيتىن بولدى. ال سوت ۇكىمىنىڭ باسقا بولىگى وزگەرتىلگەن جوق.

ارايلىم ساتىبالدى قىزى