باۋىردى قالپىنا كەلتىرىپ، ۇزاق ءومىر ءسۇرۋ ءتاسىلى تابىلدى
استانا. قازاقپارات - ستەنفورد ۋنيۆەرسيتەتى مەديتسينا مەكتەبىنىڭ عالىمدارى باۋىر جاسۋشالارىنداعى تەلومەرازا فەرمەنتتەرىنىڭ بەلسەندىلىگىن شامادان ارتتىرۋ ورگاندى قايتا باستاپقى قالپىنا كەلتىرۋگە ىقپال ەتەتىنىن انىقتادى.
وسىلايشا، باۋىر تسيرروزى مەن جاسۋشالاردىڭ قارتايۋىنا قارسى كۇرەسۋگە ارنالعان پرەپاراتتار ازىرلەۋ مۇمكىندىگى تۋىپ وتىر. بۇل تۋرالى EurekAlert! سايتىنا سىلتەمەمەن Lenta.ru حابارلايدى.
تەلومەرازا دەگەنىمىز تەلومەرلەردىڭ - جاسۋشالاردىڭ ءاربىر ءبولىنۋى كەزىندە قىسقارىپ وتىراتىن حروموسومالاردىڭ ۇشىنداعى بولىكتەردىڭ ۇزىندىعىنىڭ شامادان تىس قىسقارۋىنا كەدەرگى كەلتىرەتىن اقۋىزدى كەشەن. د ن ق- دا تەلومەرلەر اقۋىزداردىڭ امينقىشقىلدى تىزبەكتەرىمەن كودتالماعاندىقتان، بۇل بولىكتەر گەننىڭ زاقىمدانۋىنىڭ الدىن الىپ، قورعانىس قىزمەتىن اتقارادى. تەلومەرلەردىڭ قىسقارۋى جاسۋشالاردىڭ قارتايۋىنىڭ ءبىر سەبەبى بولىپ تابىلادى.
تەلومەرازا بەلسەندىلىگىن بۇعاتتايتىن مۋتاتسيا كەمىرگىشتەر مەن ادامداردا سيرروزدىڭ پايدا بولۋىنا الىپ كەلەتىنى دالەلدەنگەن. سونىمەن بىرگە فەرمەنتتىڭ شامادان تىس بەلسەندىلىگى باۋىر وبىرىنىڭ قاتەرلى جاسۋشالارىندا بايقالادى.
زەرتتەۋشىلەر تىشقانداردا باۋىر جاسۋشالارىنىڭ (گەپاتوتسيتتەر) 3-5 پايىزى تەلومەرازالاردى ۇلكەن كولەمدە قالىپتاستىراتىنىن، الايدا بۇل رەتتە ولاردا قاراپايىم مەتابوليزمگە قاتىساتىن گەندەردىڭ بەلسەندىلىگى تىم تومەن ەكەنىن انىقتادى. بۇل جاسۋشالار باۋىردا بىركەلكى ورنالاسقان جانە ورگان زاقىمدانعان جاعدايدا ولار جاڭا ءتىندى قالىپتاستىرا وتىرىپ كوبەيە باستايدى.
عالىمدار زەرتتەۋ ناتيجەلەرى باۋىردىڭ تەز جازىلۋىنا، ونى وبىردان قورعاپ، قارتايعان كەزدە باۋىردىڭ دۇرىس جۇمىس ىستەۋ مەرزىمىن ۇزارتۋعا ىقپال ەتەتىن پرەپاراتتار ازىرلەۋگە سەپتىگىن تيگىزەتىندىگىنە سەنىمدى.
