ءبىلىم نە ءۇشىن كەرەك؟
استانا. قازاقپارات -ءبىر ۇستاز ءدارىس وقىپ جاتادى. سوندا ءبىر شاكىرتى: - اعاي، بىزگە وسىنىڭ بارلىعى نە ءۇشىن كەرەك؟ - دەپ سۇرايدى.
سوندا ءمۇعالىمى ءوزىنىڭ باسىنان وتكەن وقيعانى بايانداپ بەرەدى. مەن باستاۋىش سىنىپتاردا مەكتەپتى ۇزدىك باعامەن وقىدىم. جەتىنشى- سەگىزىنشى سىنىپتارعا كوشكەن كەزدە وتپەلى كەزەڭ بولدى ما، بىلمەيمىن، بالالارمەن كوشەدە ۋاقىت وتكىزىپ، بوس جۇرگەن كەزدەرىم ۇناي باستادى. ساباعىم دا جايىنا قالدى. سوندا انام مەنى شاقىرىپ الىپ، مىناداي سۇراق قويدى:
- بالام، سەنى ءومىرىڭنىڭ سوڭىنا دەيىن نە اسىرايدى؟
- سەندەر بارسىڭدار عوي، اناشىم، - دەيمىن. - جوق، - دەپ باسىن شايقايدى،
- ءبىز ماڭگىلىك سەنىڭ جانىڭدا تۇرمايمىز. شايتان ەمەس، پەندەمىز، ءبىر كۇنى باقيلىق بولامىز. - وندا اعالارىم بار عوي، - دەيمىن.
- ولار دا ماڭگىلىك ەمەس. ءبىراز ۋاقىت جانىڭدا بولسا دا، ءبىر كۇنى ءوز وتباسىن قۇرادى، بالا- شاعاسىنىڭ قامىن كوبىرەك ويلايدى.
- تۋعان- تۋىستارىم بار ەمەس پە؟ - دەيمىن تاۋىپ ايتقانداي قۋانىپ كەتىپ.
- "اعايىن جوق بولسا، بەرە المايدى، بار بولسا، كورە المايدى" دەگەن بار، بالام. ولارعا ارقا سۇيەۋىڭ ەش جارامايدى.
- ولاي بولسا، اعالارىم سياقتى مەن دە ءوز وتباسىمدى قۇرامىن عوي. العان جارىم كومەكتەسەدى.
- جۇبايىڭ ساعان ەمەس، ەر- ازامات رەتىندە سەن وعان قامقور بولىپ، جاعدايىن جاساپ، اسىراۋىڭ كەرەك. ال اقىلىڭ مەن ءبىلىمىڭ بولماسا، ءتىپتى جاقسى جاردى دا تاڭداي المايسىڭ. قازىردەن جاقسى وقىپ، اقىلدى بولىپ، ءبىلىم جيناساڭ، اعايىندارىڭ دا ساعان ءۇيىر بولادى، باۋىرلارىڭ، ولاردىڭ بالالارى دا سەنەن كەلىپ اقىل سۇرايدى. ماڭگىلىك سەرىگىم دەپ باس قوسقان جارىڭ دا ءومىر بويى توبەسىنە كوتەرىپ، سىيلاپ وتەدى. بەدەل دە، بايلىق تا، مانساپ تا، ابىروي دا سەندە بولادى. وسىنىڭ بارلىعىنا تەك ەڭبەكتەنىپ ءبىلىم الۋمەن، اقىلمەن عانا جەتەسىڭ، بالام. ءبىلىمدى بۇگىن الماساڭ، ەرتەڭ سەن كىمگە كەرەكسىڭ؟ !- دەپ وسيەتىن ايتقان ەدى.
Massaget.kz
