اكەگە سىيلىق

الايدا سىيلىق تاڭداماس بۇرىن اكەڭىزدىڭ قىزىعۋشىلىعى مەن تالعامىن، كوزقاراسىن ەسكەرگەنىڭىز ءجون بولادى. سەبەبى سىيلاعان سىيلىعىڭىز اكەڭىزگە دەگەن تازا كوڭىلىڭىزدىڭ بەلگىسى بولماق. قۋانىش يەسىن قۋانتۋ ءۇشىن سىيلىقتىڭ ساپاسىنان بولەك، سىيلىق الۋشىنىڭ جاس مولشەرى دە ماڭىزدى. ماسەلەن، 45-50 جاس ارالىعىنداعى اكەلەر ءۇشىن سىيلىقتى ونىڭ قىزمەتى مەن قىزۋعۋشىلىعىنا سايكەس تاڭداعان دۇرىس. ماسەلەن، قىزمەتكەر اكەلەر ءۇشىن ەرەكشە قويىنداپتەر، جۇمىس ۇستەلىنە قاجەتتى بۇيىمدار نەمەسە كولىككە ارنالعان ءتۇرلى تەحنيكالار (ادەمى قاپتامالار، اۆتوموبيلگە ارنالعان شاڭسورعىش، ۆيدەوتىركەگىش، GPS- ناۆيگاتور، اۆتوماگنيتولا جانە قۇرال- سايماندار جيىنتىعى ت. ب. ) . ال بالىق اۋلاۋ كاسىبىنە قىزىقسا، بالىق اۋلاۋ تۋرالى كىتاپ، ۇرمەلى قايىق، قارماق سەكىلدى اتالعان كاسىپكە قاجەتتى دۇنيەلەردى سىيلاۋعا بولادى. الايدا بالىق اۋلاۋ كاسىبىنەن حابارى بار اداممەن بىرگە بارىپ سىيلىقتى تاڭداعان ءجون. 60 جاسقا تولىپ وتقان اكەڭىزدى ءوزىڭىزدىڭ بار جانىڭىزدى سالىپ جاساعان شىعارماشىلىق زاتتار مەن قولدان جاسالعان بۇيىمدارىڭىز بەن تۋىندىڭىز ەرەكشە قۋانتپاق. ماسەلەن، وتباسىلىق ۇلكەن سۋرەت نەمەسە قارىنداشپەن سالىنعان پورترەت، ۆيدەوقۇتتىقتاۋ، ءوز قولىڭىزدان دايىنداعان تورت نەمەسە اكەگە ارناۋ، ادەمى ولەڭدەر، ماسساجدى ورىندىق ت. ب.

كىتاپ -  ەڭ جاقسى سىيلىق كوپشىلىك اكەلەر كىتاپ وقىعاندى جاقسى كورەدى. وسى تۇستا اكەڭىزگە ەڭ سۇيىكتى اۆتورىنىڭ كىتاپتارىن، جاڭا جيناقتارىن سىيعا تارتساڭىز، قۋانىپ قالارى ءسوزسىز. سونىمەن قاتار، سالاۋاتتى ءومىر سالتى، پايدالى تاعام تۇرلەرى تۋرالى انىقتامالار دا جاقسى تارتۋ بولماق. كوسمەتيكالىق سىيلىق كەز كەلگەن اكە بالاسىنىڭ قانداي دا بولسىن سىيلاعان سىيىنا ەرەكشە قۋانارى انىق. ماسەلەن، كوسمەتيكالىق سىيلىق (دۋشقا جانە قىرىنۋعا ارنالعان گەل، ساقال قىرعىش، ءيىسسۋ ت. ب. ) جاي كورىنگەنىمەن بۇل دا ەرەكشە سىيلىقتار قاتارىندا. سونىمەن قاتار جىلى جەمپىر مەن ادەمى جەيدە، گالستۋك نەمەسە «ەڭ كەرەمەت اكە» سىندى جازۋلارى بار جەيدەمەن اكەڭىزدىڭ كوڭىلىن ءبىر كوتەرەسىز. بىلعارى ساپالى بەلدىك، ءاميان، گالستۋك قىستىرعىش پەن ادەمى تۇيمەلەر، جاقسى قولشاتىر، جىلى جامىلعى، سىرت كيىم، ۇيالى تەلەفون ت. ب. وسى سەكىلدى قاجەتتى دۇنيەلەردى دە سىيلاۋعا بولادى.

ەموتسيونالدى سىيلىقتار اكەڭىز ۇناتاتىن ءانشىسىنىڭ كونسەرتىنە نەمەسە اكتەرىنىڭ فيلمىنە 2 بيلەتتى سىيلىققا ۇسىنساڭىز، ەستەن كەسپەس سىيلىق جاسادىم دەي بەرىڭىز. سونىمەن قاتار ساياحاتتاۋعا نەمەسە كۋرورتتىق دەمالىسقا ارنالعان 2 بيلەت نەمەسە پەينتبول ويناۋعا جانە كارتينگتە سىرعاناۋعا ارنالعان سەرتيفيكات، قالاداعى ءتۇرلى تاريحي ورىندارعا بارىپ قىدىرۋعا ارنالعان بيلەت تە -  ەرەكشە سىيلىقتار قاتارىندا. جاقىن جانىڭىز جۇرەگىڭىزدەن ورىن العاندىقتان، ونىڭ جۇرەگى دە سىزدەن كوپ دۇنيەنى تالاپ ەتپەيدى. ول ءۇشىن ءسىزدىڭ ءبىر اۋىز جىلى ءسوزىڭىز بەن قۇتتىقتاۋىڭىز جەتىپ جاتىر. ال، اتا- انا ءۇشىن باستىسى - ءسىزدىڭ اماندىعىڭىز، دەنىڭىزدىڭ ساۋلىعى. الايدا ەستەلىك اتتى دۇنيەنىڭ ەسكىرمەيتىنىن بىلسەڭىز، تۋعان كۇندە ەرەكشە ءبىر ەستەلىكتىڭ بولعانى جاقسى.

وسى تۇستا Massaget.kz تىلشىلەرى مەن وقىرماندارى اراسىندا "اكەڭىزگە تۋعان كۇنىندە نە سىيلايسىز؟ ەرەكشە سىيلىعىڭىز ەسىڭىزدە مە؟ وتباسىندا اكەڭىزدىڭ تۋعان كۇنىن قانداي دەڭگەيدە اتاپ وتەسىزدەر؟ " دەگەن 3 سۇراق اياسىندا ساۋالناما العان بولاتىنبىز. ەندەشە بىزبەن بىرگە وقي وتىرىڭىزدار.

اسەل اسانوۆا: مەنىڭ اكەمە ەڭ ۇزدىك سىيلىقتى 21 جاسىندا انام سىيلاپ قويعان. وزىمنەن كەيىنگى ءسىڭلىم اكەمنىڭ تۋعان كۇنىندە ومىرگە كەلدى. سول سەبەپتى بولار، ءسىڭلىمنىڭ تۋعان كۇنىنىڭ تاساسىندا قالىپ قوياتىن سياقتى. تويلاۋعا تۋىستار كەلگەندە دە اكەمدى جاي قۇتتىقتاپ، سىيلىقتى سىڭلىمە اكەلەدى. اكەم جىل سايىن تۋعان كۇنىن كۇندىز تۋىستارمەن، كەشكە دوستارىمەن اتاپ وتەدى. اكەم ءوزى وزگەلەرگە سىيلىق جاساۋعا شورقاق، سوندىقتان وعان دا ەرەكشە سىيلىق جاساۋ ەشكىمنىڭ ويىنا كەلمەيتىن سياقتى. مەن اتامنىڭ قىزىمىن، وعان بارلىق بالالارى جينالىپ. جىل سايىن باعالى سىيلىق جاساۋعا تىرىسامىز، 50, 60, 62, 65, 70 جاسقا جەتكەن جىلدارى ۇلكەن كولەمدە توي جاسايمىز.

 ەربول مولداجانوۆ: مەكتەپ جاسىندا اكەمە ەڭ كوپ سىيلاعان دۇنيەم -  قولساعات. سەبەبى، ءوزىم قولساعاتتى ەرەكشە جاقسى كورەمىن. الايدا، اكەم مەن سىيلاعان ساعاتتىڭ ەشقايسىسىن تاقپادى. بىردە اكەم قوناققا كەلگەن باۋىرىنا بىرەۋىن سىيلىق رەتىندە تاعىپ جىبەرگەنى ەسىمدە. سوندا، «تيىننان تەڭگە قۇراستىرىپ، العان سىيلىعىمدى تاقپاي، باسقاعا بەرە سالدى» دەپ ىشتەي رەنجىگەن ەدىم. ارتىنان «قۇر تۇرىپ توزعانشا، مۇمكىن، وسى دۇرىس بولعان شىعار» دەپ ويلاپ، ءوزىمدى جۇباتقانمىن. ال سىيلاعان ءامياندارىمدى ءوزى ۇستايتىن. ول ەندى بالا كەزدەر ەدى عوي. ال، ۋنيۆەرسيتەتتە 1-2-كۋرستا وقىپ جۇرگەندە شاكىرتاقىما اكەمە ۇيالى تەلەفون سىيلادىم. الايدا ءوز قولىممەن بەرە المادىم. سەبەبى، 11 - جەلتوقسان قىستىق ەمتيحانمەن تۇسپا- تۇس كەلىپ قالاتىن ەدى. جول تۇسپەگەن سوڭ، سىيلىعىمدى تۋىسقان اعامنان بەرىپ جىبەرگەنمىن. وتكەن جىلى سمارتفون سىيلادىم. بۇگىندە ىشتەي ويلاپ جۇرگەن ءبىر سىيلىق بار. ءبىراق ول -  ۋاقىتتىڭ ەنشىسىندە. ال، نەگىزىندە اكەمنىڭ تۋعان كۇنىن قارا شاڭىراقتا جاقىن جاندارمەن، تۋىسقاندارمەن، دوستارىمەن اتاپ وتەمىز.

 توميريس ەسقالي: اكەمنىڭ تۋعان كۇنىنە سىيلىق الماپپىن. ءبىراق، جىلدا حابارلاما جازىپ جىبەرەمىن. اكەم ەموتسياسىن كورسەتە بەرمەيدى. سوندىقتان نە سەزىنەتىنىن بىلمەيمىن. جىل سايىن اكەمنىڭ دوستارى كەلىپ اكەمدى قۇتتىقتايدى. ناعاشىلارىم، اكەمنىڭ باۋىرلارى كەلىپ، باس قوسامىز.

ەركەبۇلان كەرىمبەك ۇلى: اكەمىزدىڭ تۋعان كۇنىن وتباسىندا تويلايمىز. ول -  اكەمنىڭ قالاۋى. ءوزى تۋعان كۇندى ارنايى اتاپ وتكەندى ۇناتپايدى. داستارقان جايىپ، ءتورت كوزىمىز تۇگەل وتىرامىز، ال قۇتتىقتاۋ ءۇشىن اعايىن- تۋىستاردىڭ ءوزى ءبىلىپ كەلە بەرەدى. اكەم ءوزى حابارلاسىپ تۋعان كۇنىنە شاقىرعانىن ءالى كۇنگە دەيىن كورمەپپىن. كىشكەنتاي كەزىمدە «اكە، ەندى مەن بۇزىق بولمايمىن» دەپ تۋعان كۇنىندە اكەمدى ءبىر كۇلدىرتىپ الادى ەكەنمىن. ال قازىر سىيلىقتى انامىزبەن اقىلداسىپ قاجەتتى، كەرەكتى زاتتارىن سىيلايمىز. ەرەكشە سىيلىق پا بىلمەيمىن، ءبىراق تەلەفون، سىرت كيىم سىيلاعانىمىز بار.

تاڭسۇلۋ ۇسەنوۆا: جالپى كەز كەلگەن ادامعا پايداسىنا جارايتىن، قاجەت زاتىن سىيلاعاندى جاقسى كورەمىن. ەرەكشە سىيلىق دەۋگە كەلە مە، مۇنىسىن بىلمەدىم. قۇران كىتاپ پەن جايناماز سىيلاعانمىن. شاما- شارقىمىزعا قاراي جينالىپ وتىرامىز. باستىسى اعايىن- تۋىستار تۇگەل، داستارحان جايۋلى. اق نيەتپەن جينالعان اعايىننىڭ اراسىندا تىلەۋلەس جاندارمەن بىرگە اتاپ وتەمىز. ومىردەگى ارداقتى جان، اسقار تاۋ اكەڭىز ءۇشىن ءسىز جاساعان سىيلىقتىڭ ءبارى دە ەرەكشە. الايدا اكەڭىزدىڭ تۋعان كۇنىندە قانداي سىيلىق جاسايسىز؟

Massaget.kz