ەلوردادا «مەن سەزەمىن» اتتى كورمە ءوتىپ جاتىر - فوتو
استانا. قازاقپارات - بۇگىن استانادا «رۋحاني جاڭعىرۋ» باعدارلاماسىنىڭ اياسىندا ادامداردان ءزابىر كورگەن جانۋارلارعا قاتىستى پروبلەمانى ارقاۋ ەتكەن «مەن سەزەمىن» اتتى جىل سايىنعى قايىرىمدىلىق كورمەسى ءوز جۇمىسىن باستادى، دەپ حابارلايدى ەلوردا اكىمدىگىنىڭ رەسمي سايتى.
قالاداعى جاھاندىق وزگەرىستەردىڭ نەگىزىندە ازاماتتىق باستامالار جاتقاندىقتان، ەرەكشە كورمەگە استانا قالاسىنىڭ اكىمدىگى قولداۋ كورسەتۋدە.
ەرىكتىلەردىڭ جۇمىسى - بەلسەندى ومىرلىك ۇستانىمنىڭ، قالا مەن ونىڭ تۇرعىندارىنىڭ تاعىدىرىنا دەگەن جاۋاپكەرشىلىكتىڭ ماڭىزدى بەلگىسى. قوعام ءۇشىن وزەكتى ماسەلەلەردى شەشۋ «وزگەرىستى وزىڭنەن باستا» قاعيداسى بويىنشا سانانى جاڭعىرتۋدان، ال وتانعا دەگەن ماحاببات ءار ازاماتتىڭ الەۋمەتتىك جاۋاپكەرشىلىگىن تانىتۋىنان باستالادى. «رۋحاني جاڭعىرۋ» باعدارلاماسىنىڭ «اتامەكەن» باعىتى دا وسى قاعيدانى نەگىز ەتكەن.
«Keruen city» ساۋدا ورتالىعىندا ۇيىمداستىرىلعان فوتوكورمەدە كەلۋشىلەر نازارىنا رۋسلان حاسانوۆ، تيمۋر جۇماتوۆ، ەلەنا سىچەۆا، يرينا احماديەۆا، ليليا باترەيەۆا، ءسانيا قۇدايقۇلوۆا، انار مايكوپوۆا، ەلەنا پولياكوۆا سياقتى ەلورداعا اتى تانىس 9 سۋرەتشىنىڭ جۇمىستارى قويىلعان. ءار سۋرەتتىڭ نەگىزىندە ەرەكشە وقيعا جاتسا كەرەك.
شارا ۇيىمداستىرۋشىلارى بۇل وقيعالار ادامداردىڭ جانۋارلارعا دەگەن اياۋشىلىق سەزىمىن وياتىپ، ءتورت اياقتى دوستارىنا دەگەن ءزابىردىڭ تۇبىرىمەن جويىلۋىنا سەپتىگىن تيگىزە الادى، دەپ ەسەپتەيدى.
«ءبىز بۇل كورمەنى ەكىنشى جىل قاتارىنان ۇيىمداستىرىپ وتىرمىز. بىلتىر كورمەگە الپىسقا تارتا ادام قاتىسسا، بيىل ارىز بەرۋشىلەردىڭ سانى ەكى ءجۇز ەلۋگە جەتتى. جىل سايىن ءبىزدىڭ قاتارىمىزدىڭ ۇلعايىپ وتىراتىنى قۋانىشتى جاعداي، ارينە. ءبىز ادامداردىڭ ءوز «دوستارىن» ساتىپ العانىن ەمەس، ولاردى جانۋارلار ۇيىنەن العانىن قالايمىز. كورمەدەگى ءار سۋرەتتە قۇتقارۋ وقيعاسى بەينەلەنگەن. قۇتقارۋشى ادام عانا ەمەس، جانۋار دا بولا الادى. مىسالى، كۇيەۋى ومىردەن وزعاندا ايەلدىڭ كۇيزەلىستەن شىعۋىنا كومەكتەسكەن ءيتتىڭ سۋرەتى تۇر وسىندا. ءقازىر ولار - ايىرىلماس دوستار»، - دەيدى «قايىرىمدىلار كلۋبىنىڭ» نەگىزىن قالاۋشى گۇلميرا ابدراشەۆا.
تۇرعىندار بۇل جۇمىستاردى تەگىن تاماشالاي الادى، قايىرىمدىلىققا ارنايى اقشانى ءبولۋ دە مىندەتتى ەمەس. ال ەرىكتى تۇردە قول ۇشىن سوزعىسى كەلەتىندەرگە كورمە اۋماعىندا ارنايى جاشىك ورناتىلعان. جينالعان بارلىق قاراجات «كوۆچەگ» جانۋارلار ءۇيى مەن قالاداعى @zverohelp_astana جانۋارلاردى قورعاۋ جونىندەگى قوزعالىستىڭ ەرىكتىلەرى اراسىندا ءبولىنىپ، جانۋارلارعا ارنالعان ەكپەلەرگە، زارارسىزداندىرۋ شارالارىنا، جانۋارلار ازىعىنا جۇمسالاتىن بولادى.
ايتا كەتەيىك، كورمە «Keruen city» ساۋدا ورتالىعىندا (قورعالجىن تاس جولى، 1) 6 -ساۋىرگە دەيىن جۇمىس ىستەمەك.
جانۋارلاردى قورعاۋعا، ولارعا مەيىرىمدىلىك تانىتۋعا شاقىراتىن مۇنداي كورمەلەر الەمدىك تاجىريبەدە قوعام تاراپىنان ۇلكەن قولداۋ تابۋدا. استانا قالاسىنىڭ اكىمدىگى وسى پروبلەمانى كوتەرە وتىرىپ، ءۇيسىز جانۋارلاردىڭ سانىن ازايتۋ ماقساتىندا ءبىرقاتار شارالاردى قولعا العان. «استانا جاستارى» ج ر و- نىڭ ديرەكتورى مۇحامەدجان بولىسبەكتىڭ بەرگەن مالىمەتىنە سۇيەنسەك، قازىرگى تاڭدا ەلوردادا 4 گ ا جەرگە بايلانىس زووباعى بار جانۋارلارعا ارنالعان ءۇيدى ورنالاستىرۋ جوباسى ازىرلەنۋدە. وسى جوبانىڭ جۇزەگە اسۋىنىڭ ناتيجەسىندە استانالىقتار زووباقتا سەرۋەندەپ ءجۇرىپ، وزىنە ۇناعان جانۋاردى اسىراپ الا الاتىن بولادى.
