بالاڭىز قاراڭعىدان قورىقسا

ءبارىمىز دە بالالارىمىزعا قولدانىپ جۇرگەن كۇندەلىكتى ءادىس. ءبىراق مامانداردىڭ ايتۋىنا قاراعاندا، بالانى بۇلاي ۇيىقتاتۋ ونىڭ پسيحولوگياسىنا كەرى اسەرىن تيگىزەدى. بولاشاقتا نيكتوفوبياعا شالدىعۋىنا اكەلىپ سوعادى ەكەن. نيكتوفوبيا گرەكتىڭ nyktos -  ءتۇن، phobos -  قورقىنىش سوزدەرىنەن پايدا بولعان، قاراڭعىلىقتان قورقۋ سەزىمى. بالاڭىزدىڭ قاراڭعىلىقتان قورقۋى 3-5 جاسىندا باستالادى. بۇل قالىپتى جاعداي. سەبەبى، سول جاستان باستاپ ولار كينو، مۋلتفيلم كورىپ، ەرتەگى ەستىپ، ەستىگەن، كورگەن نارسەلەرىن قورىتىپ، ءوز بەتتەرىنشە ويلانا باستايدى. بالاڭىز قاراڭعىلىقتان قورىقسا، وعان جاۋاپسىزدىقپەن قاراماڭىز، كەرىسىنشە، قورقىنىشىن جەڭۋگە كومەكتەسىڭىز. نەگىزىندە، بالالار قاراڭعىلىقتان قورىقپايدى، تەك، قاراڭعى جەرلەردە ءار ءتۇرلى زاتتاردىڭ كوزىنە قورقىنىشتى بولىپ ەلەستەۋىنەن، قيالىندا جاساپ العان كەيىپكەرلەرلەرىنەن قورقادى.

 ونىڭ تەلەديدار الدىندا كوپ وتىرۋىن شەكتەڭىز. قورقىنىشتى باعدارلامالار كورمەۋىن قاداعالاڭىز. ەگەر، بالاڭىز ۇيىقتار الدىندا قورىقسا ءالسىز جارىعى بار شام جاعىپ قويىڭىز. بالانى قاراڭعى جەرلەرگە ەرتىپ اپارىپ، مىسالى، ۇيدەگى قاراڭعى بۇرىشقا، كەرەۋەتتىڭ استىنا، ءبىرشاما بىرگە وتىرىڭىز، اڭگىمەلەسىڭىز. «باتىرىڭىز» ول جەرلەردە ەشتەڭە جوعىنا كوز جەتكىزسىن. ءتۇرلى سازبالشىقتاردان قيالىنداعى قورقىنىشتى جانۋارلاردى بىرگە وتىرىپ جاساڭىز. كەيىن ولاردى ادەپكى ءۇي جانۋارلارىنا اينالدىرىپ، مىسالى سۇيكىمدى كۇشىككە، كىشكەنتاي مىسىققا، سول ويىنشىقتارمەن بىرگە وتىرىپ ءبىرشاما ويناڭىز. تىپتەن بولماسا، قورقىنىشتى ماقۇلىقتىڭ سۋرەتىن قاعازعا سالىپ، ونى بالاڭىزدىڭ كوز الدىندا جىرتىپ تاستاڭىز. سوسىن، تۇندە جاتار الدىنا سول «ماقۇلىقتىڭ» قالاي سازايىن بەرگەنى جايلى ەسىنە سالىپ قويىڭىز. سوندا عانا بالا قيالىندا قورقىنىشتى ەمەس، ىزگى ويلار بۇرشىك اتا باستايدى. ءسىزدى قامقورشى اكە (انا) رەتىندە كورىپ وزدەرىن قاۋىپسىز سەزىنەدى.

ماماندار بالانى تارتىپكە ۇيرەتكەن ءجون دەپ سانايدى. ەرتە جاتقىزىپ، ەرتە تۇرۋىنا ادەتتەندىرىڭىز. ۇيىقتار الدىندا باتىرلار جايلى ەرتەك ايتىپ بەرىڭىز، باتىرلار جىرىن وقىپ بەرىڭىز. ءوزىن دە سول باتىرلارداي، ويىنشىقتارىنىڭ قورعاۋشى ەكەندىگىن سەزىندىرۋگە تىرىسىڭىز. وتباسىلىق پروبلەمالارىڭىزدى بالا الدىندا ەكىنشى ورىنعا قويىڭىز. ونىمەن قاشاندا كوڭىلدى قارىم- قاتىناس جاساڭىز. سەبەبى، وتباسىلىق كيكىلجىڭدەر بالا جۇرەگىن تەز جارالايدى، وسكەندە پەسسيميزمگە ۇرىندىرادى. بولاشاقتا ماڭىزدى قادامدار جاسار الدىندا السىزدىك تانىتادى. كوڭىل تۇكپىرىندە قالىپ قويعان «بالا قورقىنىشى» قايتا- قايتا مازالايدى.

 تۇپتەپ كەلگەندە مۇنىڭ ءبارى ونىڭ ىشكى رۋحىنا اسەر ەتىپ، تەز «سىنعىش» بولۋىنا اكەلىپ سوعادى. ءسابي -  جاس وسكىن. قالاي باپتاپ وسىرسەڭ بولاشاقتا سولاي جەمىسىن بەرەدى. قيسىق اعاشتى باعبان كەسىپ قانا تۇزەتە الادى. ال، بالانى وسكەسىن تۇزەتۋ ەكىنىڭ ءبىرىنىڭ قولىنان كەلە بەرمەيتىن ءىس ەكەنىن ەستەن شىعارماعانىمىز ابزال. قورقۋ قالىپتى جاعداي، سەبەبى ءبارىمىز دە قورقامىز عوي. تەك، بۇلدىرشىندەرگە قاراعاندا ۇلكەندەر قورقىنىشىن جاسىرا الادى. سوندىقتان، قورقىنىشتىڭ يلليۋزيا ەكەنىن، ءبىراق قاشان دا قاۋىپتىڭ بار ەكەنىن بالاڭىزعا تۇسىندىرە ءجۇرىڭىز. باتىر بابالاردىڭ ۇرپاعى بالاڭىز دا باتىر بولىپ ءوسسىن. قازاق «تاۋەكەل ەردىڭ ءومىرى» دەپ بەكەر ايتپاعان.

Massaget.kz