قازاقستاندا ىشىمدىككە قۇمار اتا- انالارعا سوت تارتىبىمەن تىيىم سالۋعا بولادى

قازاقستاندا ون مىڭداعان جانۇيا الەۋمەتتىك جاعدايى تومەن وتباسى رەتىندە تىركەۋدە تۇر. كوبىنەسە مۇنداي وتباسى مۇشەلەرىنىڭ ءبىرى ىشىمدىككە نەمەسە ەسىرىتكىگە قۇمار بولادى. وتكەن جىلدىڭ ءساۋىر ايىنا دەيىن مۇنداي وتباسىلارعا ەشقانداي شارا قولدانۋ مۇمكىن ەمەس ەدى. الايدا بىلتىر كوكتەمدە ق ر اكىمشىلىك كودەكسىنە پايدالى تولىقتىرۋلار ەنگىزىلدى.

«پروتسەسكە قاتىسۋشىلاردىڭ نەمەسە ىشكى ىستەر ورگاندارىنىڭ ءوتىنىشى بويىنشا سوت الكوگول، ەسىرتكى نەمەسە پسيحوتروپتى پرەپاراتتاردى ءۇش ايدان ءبىر جىلعا دەيىن پايدالانۋعا تىيىم سالۋى مۇمكىن» ، دەلىنگەن ق ر اكىمشىلىك كودەكسىنىڭ 54- بابىندا.

وسكەمەندە زاڭگەرلەردىڭ كەيبىرى بۇل باپتىڭ ىسكە اسقانىن كورمەگەندەرىن ايتادى.

«بۇل باپ كودەكستە 2014 -جىلدان بەرى بار جانە بىرنەشە مارتە تۇزەتۋ ەنگىزىلگەن. تۇزەتۋلەر سانىنا قاراپ، بۇل باپتى ەشكىم ءىس جۇزىندە قولدانىسقا ەنگىزە الماعانىن بايقاۋعا بولادى. بۇل باپ بويىنشا شارالار شاعىمدانۋشى تاراپىنان ىسكە اسىرىلادى دەپ بولجانعان. كورىپ وتىرعانىمىزداي، ەشكىم ايتارلىقتاي شاعىم تۇسىرگەن جوق. ەندى بۇل سوتتىڭ قۇقىعى» ، - دەيدى زاڭگەر يرينا يسرافيلوۆا.

زاڭگەر سوت شەشىمىمەن بولعان تىيىمدى بۇزۋ فاكتىسىن دالەلدەۋ وتە وڭاي ەكەنىن ايتادى. قاجەت جاعدايدا پوليتسيا قىزمەتكەرلەرىن شاقىرساڭىز بولعانى. مۇنداي جاعدايدا زاڭ بۇزۋشى ىشىمدىك ىشكەنى نەمەسە ەسىرتكى شەككەنىن تەكسەرۋگە جىبەرىلەدى. سونداي- اق، زاڭ بۇزعان ادامدى تۇتقىنداۋعا دا بولادى.

«تۇرمىستىق زورلىق- زومبىلىق كورگەن ادام مەن زارداپ شەكتىرگەن ادامنىڭ بىرگە تۇرۋىنا تىيىم سالىنۋى دا ءىس جۇزىندە ىسكە اسا بەرمەيدى. جابىرلەۋشىنىڭ باسقا ءۇيى بولعان جاعدايدا عانا زاڭ بويىنشا بولەك تۇرۋدى تالاپ ەتە الامىز، ءبىراق تۇرمىستىق زورلىق- زومبىلىق كوبىنەسە الەۋمەتتىك جاعدايى تومەن وتباسىلاردا بولادى. ونداي ادامنىڭ ەكىنشى ءۇيى نەمەسە پاتەرى بولۋى مۇمكىن ەمەس» ، - دەيدى زاڭگەر.

Baq.kz