تۇڭعىشباي جامانقۇلوۆ باياننىڭ تاريحي سەريال ءتۇسىرۋىن ۇلكەن قىلمىسقا تەڭەدى
استانا. قازاقپارات - اتىشۋلى الاگوزوۆا پروديۋسەرلىك ەتكەن «قوزى كورپەش - بايان سۇلۋ» تەلەحيكاياسىنا قاتىستى داۋعا ءالى كۇنگە دەيىن نۇكتە قويىلار ەمەس.
بۇل جولى اتالمىش تۋىندىعا تۇڭعىشباي جامانقۇلوۆ نارازىلىق ءبىلدىردى.
NUR. KZ تىلشىسىنە ەكسكليۋزيۆتى سۇحبات بەرگەن حالىق ءارتىسى، بايانعا وكپە-رەنىشىن ءبىلدىردى.
«قازىرگى ۋاقىتتا «قوزى كورپەش-بايان سۇلۋ» تەلەسەريالىنا قاتىستى داۋ-دامايدىڭ بارلىعىن وقىپ وتىرامىن. كوپشىلىك ايتقان وكىنىشتەرگە قوسىلامىن. قازاقتىڭ كلاسسيكاسىنا بىلاي كەلمەۋ كەرەك. دايىندىقپەن كەلۋ كەرەك. نە دەۋشى ەدى..؟ «كيەسى اتىپ كەتەدى»، - دەپ قورقۋ كەرەك كىشكەنە.
«بوياۋشى، بوياۋشى دەگەن سايىن، ساقالىن بوياپتى» - دەگەن قازاقتا وتە قيىن ماقال بار. سونشا حالىقتىڭ الدىنا شىقتىم دەپ تايراڭداي بەرۋگە دە ەشكىمنىڭ حاقىسى جوق.
حالىقتىڭ ىقىلاسىنان، حالىقتىڭ سۇيىسپەنشىلىگىنەن اجىراپ قالۋ وپ-وڭاي. سول جاعىنان قاراعان كەزدە، ول ماسەلەلەرگە مەن وتە اۋىر قارايمىن. جۇرەگىم اۋىرادى. جاقسى دەپ ايتا المايمىن. مەن مۇنى قىلمىس دەۋگە دە بارمىن»، - دەيدى تۇڭعىشباي جامانقۇلوۆ.
اكتەردىڭ ايتۋىنشا، قوعامدا قىزۋ تالقىعا تۇسكەن تەلەحيكايانىڭ كەمشىن تۇستارى جەتەرلىك. سوندىقتان دا جامانقۇلوۆتىڭ «بايان الاگوزوۆا بۇدان بىلاي تاريحي تاقىرىپتاعى تۋىندىلاردى تۇسىرمەسە» دەگەن ۇلكەن ءوتىنىشى بار.
«الدىندا تراكتورشى تۋرالى تۇسىرگەن جۇمىسىن كورگەن ەدىم. ونى بالكىم كورۋگە بولار ما ەدى. ويتكەنى قازىرگى زامانعا بايلانىستى ما، ويدان شىعارسا دا، سۋىرتپاقتاپ بىردەڭەنى شىعارعان بولاتىن. ال «قوزى كورپەش - بايان سۇلۋ» سياقتى كلاسسيكاعا دايىندىقپەن كەلۋ كەرەكتىگىن بايان قارىنداسىم تۇسىنبەگەن بولۋى كەرەك دەپ ويلايمىن»، - دەيدى حالىق ءارتىسى.
حالىق ءارتىسى باياننىڭ بۇل قىلىعىن ناعىز قىلمىسقا بالاپ وتىر. تانىمال پروديۋسەردىڭ باستاماسىمەن تاسپالانىپ، كەيىن كوپشىلىكتىڭ تالقىسىنا تۇسكەن تەلەتوپتاما ۇلتتىق قۇندىلىقتان جۇرداي دەيدى.
«بايان قارىنداسىممەن ونشا قاتتى ارالاستىعىم بولماسا دا، بىلەمىن ەپتەپ-سەپتەپ. ول ورە-قارىم كينو تۇسىرۋگە ماشىقتانۋ ءبىر بولەك، سودان سوڭ سۋرەتكەرلىك ۇجدان دەگەن بار، سۋرەتكەرلىك ۇستانىم دەگەن بار. سۋرەتكەرلىك دەگەن ۇعىمدى جەڭىل-جەلپى قاراپ كەتكەنىنە وكىنىشپەن قارايمىن. بۇل پىكىرىم وزگەرمەيدى.
قارىنداسىم بولعان سوڭ، قاتتى ايتقىم كەلىپ تۇرعان جوق. جاسىم ۇلكەن اداممىن. مۇمكىن تۇسىنەر، مۇمكىن ۇعار دەگەندەي. سول جاعىنان قاراعان كەزدە كينو تۇسىرۋگە، تەاترلاردا سپەكتاكل قويۋعا كەلگەندە ۇلكەن دايىندىق جانە قۇقىق كەرەك. بىلىمدىلىك كەرەك.
سودان كەيىن ۇلتتى ەسەپسىز ءسۇيۋ كەرەك. ۇلتتىڭ تاريحىن ءبىلۋ كەرەك. ۇلتتىڭ ماقتانىشىنا اينالعان، سوناۋ ارعى زامانداردان كەلە جاتقان، نەشە مىڭ ۇرپاقتاردى تاربيەلەپ، ادەمى ماحابباتقا تالپىناتىن قازاقتىڭ ۇل-قىزدارىنىڭ تالعامىن، الگىندەي شالا فيلممەن بۇزۋعا بولمايدى دەپ ەسەپتەيمىن»، - دەيدى اكتەر.
ەستەرىڭىزگە سالا كەتسەك، وسى ۋاقىتقا دەيىن مەرۋەرت تۇسىپبايەۆا دا «قوزى كورپەش - بايان سۇلۋ» تەلەحيكاياسىنىڭ كەمشىن تۇستارىن تىزبەكتەپ، الاگوزوۆادان جوباعا جۇمسالعان قارجىنى قايتارۋىن تالاپ ەتكەن بولاتىن.
