وسكەمەندە ءسۇت تاسيتىن كولىكتەر قۇراستىرىلۋدا

اتالمىش كاسىپورىن وسىعان دەيىن ءسۇت قابىلداۋ بەكەتتەرىنە ارنايى مودۋلدەر قۇراستىرىپ كەلگەن. ەندى 1 توننالىق ءسۇت تاسيتىن كولىكتەر قۇراستىرماق. ءوندىرىس بارىسىمەن وبلىستىڭ اكىمى دانيال احمەتوۆ تانىستى.

«2 جىل بۇرىن كاسىپورىن جارتىلاي توقتاپ تۇرعان. اۋەلى ءسۇت قابىلداۋ بەكەتتەرىنە تاپسىرىس بەردىك. ودان كەيىن كومپانيا باسشىلارىنىڭ ۇسىنىسىمەن مال سويۋ تسەحتارىن قۇراستىردىق. ەندى، مىنە، ءسۇت تاسيتىن كولىك قۇراستىرىپ جاتىرمىز. مۇنىمەن توقتاپ قالمايتىنىمىز انىق. وزگە دە جوسپارلار بار» - دەيدى دانيال احمەتوۆ.

باستاپقىدا توڭازىتقىش جاساۋمەن اينالىسقان زاۋىت بۇگىندە مەتالل قۇراندىلارى مەن سەنۆيچ- پانەلدەردەن جىلىتىلعان كەشەندەر قۇراستىرۋعا كوشكەن. ال ءسۇت ساقتاۋعا ارنالعان كۇبىلەردىڭ مەتالىن فين جانە تۇركيالىق وندىرۋشىلەردەن الۋدا.

«وڭىردە ءسۇت ءوندىرىسىن دامىتۋدىڭ وڭىرلىك باعدارلاماسى قولعا الىنعالى ءبىزدىڭ كاسىپورىننىڭ ەكىنشى تىنىسى اشىلدى. ءوندىرىستىڭ 50 پايىزىن مەملەكەت سۋبسيديالاپ وتىر. سوڭعى ءۇش ايدا 8 كولىككە تاپسىرىستى ورىندادىق. «ۋاز» كولىگىن «بيپەك اۆتو-ازيا اۆتو» كومپانيالار توبى ارقىلى الامىز. 1 توننالىق كۇبىسىمەن بىرگە باعاسى 7 ميلليون تەڭگەگە شىعادى. ءسۇت ءوندىرۋشى كووپەراتيۆتەر ءۇشىن ونىڭ اقىرعى باعاسى - 3,5 ميلليون تەڭگە. ويتكەنى جارتى باعاسىن مەملەكەت سۋبسيديالايدى» - دەيدى ءۇلبى مودۋل زاۋىتىنىڭ ديرەكتورى ۆاديم بىكوۆ.