گەرمانيا تۇرعىندارى قازاقستان حالقىن العىس ايتۋ كۇنىمەن قۇتتىقتادى

بۇل - ۆيكتور باۋم. بىرنەشە جىل بۇرىن «قازاقستانعا كەلەمىن» اتتى اتاقتى ءانىن قالاي جازعانىن ەسىنە الىپ وتىر. شىعارماسىن ەلىمىزگە ارناۋى بەكەر ەمەس. ويتكەنى مۋزىكانت قازاقستاندى ەكىنشى وتانى سانايتىنىن ماقتانىشپەن ايتادى. نەگىزى ۆيكتور - قازاق توپىراعىندا دۇنيەگە كەلگەن نەمىس. شامامەن 20 جىل بۇرىن وتباسىمەن بىرگە گەرمانياعا قونىس اۋدارعان. الايدا تۋعان جەرىن، قازاقتىڭ قوناقجايلىلىعىن ەشۋاقىتتا ۇمىتپاعانىن ايتادى.

بۇگىندە جەرلەسىمىز بيزنەسپەن اينالىسادى. بۇل سالانى ءساتتى يگەرگەن. دەگەنمەن ەڭ سۇيىكتى ءىسى ءان ايتۋ ەكەنىن جاسىرمايدى. قازىر رەپەرتۋارىندا 100-دەن استام شىعارما بار. «سونىڭ ىشىندە تۋعان جەرىم قازاقستانعا ارناعان ءانىمنىڭ ورنى بولەك»، - دەيدى ۆيكتور.

ۆيكتور باۋم، قازاقستاننان كوشىپ كەلگەن گەرمانيا تۇرعىنى:

 - بۇل -  وسىندا تۇرىپ جاتقان جەرلەستەرىمىزدىڭ سۇيىكتى ءانى. بىردە- ءبىر شارا بۇل شىعارماسىز وتپەيدى. اۋەنى مۇڭدى بولعانىمەن، ءاننىڭ ءوزى وپتيميزمگە تولى.

 ۆيكتور باۋمنىڭ وتباسى قازاقستاندى جىرعا قوسىپ قانا قويماي، ۇلتتىق تاعامدارىمىزدى دا ۇنەمى دايىنداپ وتىرادى. ماسەلەن، بۇل جولى جارى ولگا بەشبارماق ازىرلەپتى.

ولگا باۋم:

- قامىرىن ءوزىڭ يلەپ، ءوزىڭ جايماساڭ، بۇل قانداي بەشبارماق بولادى؟ مىندەتتى تۇردە قامىرىنا سورپا قوسىپ يلەيمىز. مۇندايدى قازاقستاندا ۇيرەندىك. بالا كەزىمىزدەن بىلەمىز. وسىنداي ەرەكشەلىكتەر قازاقستانمەن اراداعى بايلانىسىمىزدى ۇزۋگە جول بەرمەيدى.

 مىناۋ -  ولگا باۋمنىڭ اناسى ميليا اجەي. 80 جاستاعى كەيۋانا «سۋرەتتەرگە قاراپ وتىرىپ قازاقستاندا العاشقى ماحابباتىمدى كەزدەستىرگەنىمدى، تۇڭعىشىمدى دۇنيەگە اكەلىپ، قازاقتىڭ تويىنا بارعان ساتتەرىمدى ەسكە الامىن»، -  دەيدى. الايدا وتباسىنىڭ دەپورتاتسياعا ۇشىراعانى جايلى ايتقاندا، كوزىنىڭ جاسىن تيا الماي قالادى. كەيۋانا «قازاقتار بولماسا، سارىشۇناق ايازدان امان قالماس ەدىك»، -  دەيدى. گەرمانياعا قونىس اۋدارعانىنا 30 جىلدان اسسا دا، ءالى كۇنگە دەيىن قازاقشا ەمىن- ەركىن سويلەيدى.

ەميليا، قازاقستاننان كوشىپ كەلگەن گەرمانيا تۇرعىنى:

- ول زاماندا بارلىعىنا قيىن بولدى. جالعىز ءبىز كوشىپ كەلگەن جوقپىز. جالعىز نەمىستەر ەمەس، وندا ينگۋشتار دا بولدى، پولياكتار دا بولدى. جىلىمدى دەگەن اۋىلعا كەلدىك. قيىنشىلىق بولدى، اشتىق بولدى. 40 گرادۋسقا دەيىن سۋىق بولدى. سودان ءبىز جىلى جاقتان كەلدىك، قالىڭ كيىم بولعان جوق. ءبىز قازاق جۇرتىنىڭ اراسىندا كەلگەندە قازاقشا بىلگەن جوقپىز. مەنىڭ جولداسىم قازاقشا سويلەيتىن، ءتىرى كۇنىندە قازاقشا سويلەيتىنبىز.

 ۆيكتور باۋم، قازاقستاننان كوشىپ كەلگەن گەرمانيا تۇرعىنى:

- مەنىڭ اتا- انام مەن تۋىستارىم ۇنەمى قازاقتارعا دەگەن العىسىن جەتكىزىپ وتىرعان. ولار «وسى ۇلتتىڭ كەڭپەيىلدىگى مەن مەيىرىمدىلىگىنىڭ ارقاسىندا امان قالدىق» دەيتىن. مەنىڭ دە العىسىم شەكسىز.

ۆيكتور باۋمنىڭ وقيعاسى - كەڭ- بايتاق قازاقستان وتانىنا اينالعان مىڭداعان نەمىس وتباسىنىڭ باسىنان وتكەرگەن جاعداي. ولاردىڭ بارلىعى ءبىراۋىزدان «قازاقستانعا دەگەن العىسىمىز شەكسىز» دەيدى. سوندىقتان ەلىمىزدەن كوشىپ كەتسە دە، سالت- ءداستۇرىمىزدى ساقتاپ، ۇلتتىق مەرەكەلەرىمىزدى اتاپ وتەدى، قازاقشا سويلەيدى.

اۆتورلارى: جۇلدىز اتاگەلديەۆا، شولپان نايمانبايەۆا، ميلوسلاۆ لاۆرينوۆسكيي

http://24.kz/kz