جاپون قىزىنا ۇيلەنگەن قازاق جىگىتى: ايەلىم تۋىستارىمنان قارىز سۇراتپايدى

  استانا. قازاقپارات - جاپوپ قىزىنا ۇيلەنىپ، بوتەن ەلگە كوشىپ كەتكەن قازاق جىگىت باسىنان وتكەن قيىندىقتارى تۋرالى ايتتى.

 وسىدان 12 جىل بۇرىن جاپون قىزىنا ۇيلەنگەن ءالي ءابدىعالي جاپون حالقىنىڭ جابايى سالتتارى تۋرالى ايتىپ، ءوز ويىمەن ءبولىستى. قازاق جىگىتى وزىمەن بىرگە وقىعان جاپون قىزى ايكو تانيمەن شاڭىراق كوتەرگەن. ۇيلەنۋ تويىن ءوز جەرىندە وتكىزگەن جىگىت بىردەن جاپونياعا كوشىپ كەتكەن.

بۇل تۋرالى Central Asia Monitor عا سىلتەپ، Stan.kz اقپاراتتىق اگەنتتىگى حابارلايدى.

قازاقتاردىڭ قينالعاندا ءبىر- بىرىنە كومەك بەرەتىن ادەتىنە ۇيرەتىپ قالعان ءالي، جاپوندىقتار ءتىپتى تۋعان اتا- اناسىنا قارىز بەرمەيدى ەكەن دەپ تاڭ قالدى.

«مەن قازاقستانداعى دوستارىما قارىزعا اقشا بەرىپ تۇراتىنمىن. ال جاپوندىقتار ءتىپتى تۋعان اتا- اناسىنا دا قارىز بەرمەيدى ەكەن. ءبىز تويىمىزدى وتكىزىپ جاپونياعا كوشىپ كەلگەندە، بۇل جەردە كۇن كورۋ قيىن بولدى. پاتەر جالداپ تۇرۋ ءۇشىن بىرنەشە جەردە جۇمىس ىستەپ، اقشا تاپتىم. قينالعان سوڭ قازاقستانداعى تۋىستارىمنان اقشا سۇرايىن دەسەم، ايەلىم بۇل تۋرالى ءسوز قوزعالما دەپ قارسى بولدى» ، - دەيدى قازاق جىگىتى.

وزگە ەلدىڭ سالتىن تۇسىنە قويماعان وتانداسىمىز ايەلىنەن باقىتسىز جاعدايعا ۇشىراپ قالعان جاعدايدا نە ىستەيدى ەكەنمىن دەپ سۇراعان. ونىڭ سۇراعىنا اشۋلانعان جاپون قىزى وزدەرىنىڭ ۇستاناتىن قاعيدالارىمەن بولىسكەن.

«ەگەر ول ەسى كىرگەن ۇلكەن ادام بولسا، نەگە وسى ۋاقىتقا دەيىن اقشا جيناپ قويماعان؟ ەكىنشىدەن: نەگە ول ساقتانىپ جۇرمەيدى؟ تەك قازاقتار عانا ءوز ومىرىنە نەمقۇرايلى قارايدى. سەندەر بارلىق جاۋاپكەرشىلىكتى تۋىستارىڭا نەمەسە دوستارىڭا جۇكتەپ قويعاندى جاقسى كورەسىڭدەر» ، - دەپ اشۋلاندى ايەلى كۇيەۋىنىڭ سۇراعىنا.

قازاقتىڭ قانىنا ءسىڭىپ قالعان ادەتىنەن ارىلماعان ءالي وزگە ەلدە ءبىر جىلداي قينالعانىن ايتتى. ول جاپوندىقتار بانكتەن نەسيە الىپ، بىرەۋدەن قارىز سۇرامايدى دەيدى. سونداي- اق، بۇل ەلدە مۇگەدەكتەر دە باسپاناسىز قاڭعىباستار دا الاقان جايىپ اقشا سۇرامايدى ەكەن. قازاقتار ءۇشىن قالىپتى جاعداي جاپونداردا نەمقۇرايلىقپەن قاراۋ دەپ سانالادى. ءتىپتى قوناققا بارۋ ءۇشىن دە ءبىر- ەكى اپتا بۇرىن ەسكەرتىپ، حابار بەرۋ كەرەك دەپ تاڭداندى وتانداسىمىز.

«ونىڭ وزىندە تۋىسىڭنىڭ ۇيىندە تۇنەپ قالۋعا بولمايدى، تەك كەيبىر جاعدايلاردا عانا اتا- اناسىنىڭ ۇيىندە قونۋعا بولادى» ، - دەيدى ءالي ءابدىعالي.