قاراعاندىلىق شەنەۋنىك كابينەتىنىڭ سىرتىنا ادىلەت ءمينيسترىنىڭ سۋرەتىن ءىلىپ قويعان

 بۇل تۋرالى Sputnik قازاقستان حابارلادى.

«ارىپتەستەرىم پورترەت تۋرالى ماعان ايتتى. مەنىڭشە، ول دۇرىس ەمەس. ويتكەنى ول مەنىڭ سۋرەتىم عوي، قولدامايمىن»، - دەدى مينيستر.

بەكەتايەۆ ءوز پورترەتىن ءىلىپ قويۋ تۋرالى ەشكىمگە تاپسىرما بەرمەگەنىن ايتتى.

«بۇل مەنىڭ باستامام ەمەس. ول باسشىنى تانىمايمىن دا. ينتەرنەتتە تاراعان سۋرەتتەردى كوردىم، ۇناعان جوق»، - دەدى ول.

شەنەۋنىكتەرگە قانداي دا ءبىر شارا قولدانىلا ما دەگەن ساۋالعا مينيستر مىرزا «باستىسى - جۇمىس، بۇعان قادالىپ قالۋدىڭ قاجەتى جوق» دەپ قىسقا قايىردى.

«تارتىپتىك، ەتيكالىق ماسەلەلەردى شەشۋ ءمينيستردىڭ ماسەلەسى ەمەس. بۇعان جاۋاپتى حاتشى بار. ول ءتيىستى تاپسىرمانى بەرىپ قويدى»، - دەپ تۇيىندەدى ءسوزىن بەكەتايەۆ.

ەستەرىڭىزگە سالىپ وتسەك، وسىدان ءتورت- بەس كۇن بۇرىن ينتەرنەتتە قاراعاندى وبلىسىنىڭ ادىلەت دەپارتامەنتىندە ءىلىنىپ تۇرعان ءمينيستردىڭ پورترەتى قىزۋ تالقىلانعان بولاتىن. سۋرەتتى جەلىگە جۋرناليستەردىڭ ءبىرى جۇكتەپ، فەيسبۋكتەگى پاراقشاسىندا جازعان.