ەمى جوق اۋرۋعا شالدىققان ايەل بار اقشاسىن شاشىپ بىتكەن سوڭ، ساۋ ەكەنىن بىلگەن

 استانا. قازاقپارات - ۇلىبريتانيا تۇرعىنى دجەكي ديبب ولىمگە اكەلەتىن اۋرۋعا شالدىققانى تۋرالى ەستىگەننەن كەيىن وتباسىنىڭ جىلدار بويى جيناعان قاراجاتىن وڭدى- سولدى شاشقان.

 ءبىراق ءبىر جىلدان كەيىن دارىگەرلەر وعان مەديتسينالىق ناتيجەنىڭ قاتە كورسەتىلگەنىن حابارلاعان.

بۇل تۋرالى The Mirror حابارلادى دەپ، جازادى Stan.kz اقپاراتتىق اگەنتتىگى.

62 جاستاعى ايەل زەرتتەۋ ناتيجەسى بويىنشا كومپيۋتەرلىك توموگرافيا جاساتىپ، قاتەرلى دەرتكە شالدىققانى جايلى بىلگەن. دارىگەرلەر ايەلدىڭ بەس جىل ءومىرى قالدى دەگەن سوڭ، ديبب جانە ونىڭ كۇيەۋى روب جىلدار بويى جيناعان اقشالارىن كوڭىل كوتەرۋگە جانە ساياحاتتايعا جۇمساۋدى شەشكەن. ەرلى- زايىپتىلار سول ۋاقىتتىڭ ىشىندە باعاسى 700 فۋنت ستەرلينگ تۇراتىن زاماناۋي توڭازىتقىشتى ساتىپ العان. ال دەمالىسقا تاعى 1500 فۋنت قاراجات جۇمساعان.

ەمى جوق اۋرۋعا شالدىققان ايەل 12 جاسار نەمەرەسىمەن دە قوشتاسىپ ۇلگەرگەن ەكەن.

«مەن ءاردايىم سەنىڭ جانىڭدامىن، ءبىراق ءتۇرىم فيلمدەردەگى قۇبىجىقتار سەكىلدى قورقىنىشتى بولادى» ، - دەگەن ايەل نەمەرەسىنە.

الايدا ءبىر جىل وتكەن سوڭ، ناۋقاس قايتا تەكسەرۋدەن وتكەن. زەرتحانا ناتيجەسى ەستە ساقتاۋ قابىلەتىندەگى ماسەلەلەر مەن قوبالجۋلار ولىمگە اكەلەتىن اۋرۋ ەمەس، انتيدەپرەسسانتتارعا بايلانىستى ەكەنىن كورسەتتى.

بۇل جاڭالىقتى ەستىگەن ديبب جانە ونىڭ كۇيەۋى اۋرۋحانا ۇستىنەن شاعىمداندى. دارىگەر بولسا تەكسەرۋ كەزىندە قاتەلىك كەتكەنىن ايتىپ، كەشىرىم سۇراپ حات جولداعان.