ترامپ مۇعالىمدەردىڭ قارۋ ۇستاۋلارىنا رۇقسات ەتۋدى ۇسىندى
فلوريدا شتاتىنىڭ پاركلەند قالاسىنداعى بۇرىنعى وقۋشى مەكتەپتەگى 17 ادامدى اتىپ ولتىرگەن وقيعادان كەيىن امەريكا قۇراما شتاتتارىندا قارۋ- جاراق اينالىمىنا قاتىستى شەكتەۋلەر تۋرالى تالقىلاۋ قايتا جاندانا ءتۇستى.
«مۇنى ءمۇعالىمنىڭ قارۋدى جاسىرىن ۇستاۋى دەپ ايتۋعا بولادى. ەگەر پەداگوگقا قارۋ ۇستاۋعا رۇقسات بەرسەك، ولار ارنايى دايىندىقتان وتەدى. مەكتەپتە قارۋلانعان مۇعالىمدەردىڭ بارىن ءبىلىپ، قىلمىسكەرلەر قارۋ اكەلۋگە تاۋەكەلگە بارمايدى» ، - دەدى ترامپ مەكتەپ مۇعالىمدەرى مەن وقۋشىلارىمەن كەزدەسۋ بارىسىندا.
پرەزيدەنت قىلمىسكەرلەر ءدال وسىنداي قارۋسىز جەرلەردە قىلمىستىق ىستەرىن جۇزەگە اسىرعىلارى كەلەدى، ويتكەنى وعان جاۋاپ رەتىندە ەشكىم وق اتپايتىنىن بىلەدى دەپ ءتۇسىندىردى. سونىمەن قاتار، ول مەكتەپتەرگە كۇزەتشى رەتىندە بۇرىنعى اسكەري قىزمەتكەرلەردى الۋدى ۇسىندى، سەبەبى ولار قارۋدى قالاي قولدانۋ كەرەك ەكەنىن بىلەدى.
سونداي- اق، ول مۇنداي اتىس وقيعالارى شامامەن 3 مينۋتقا سوزىلاتىنىن، ال پوليتسيا قىزمەتكەرلەرىنىڭ وقيعا ورنىنا جەتۋلەرىنە جوق دەگەندە 5-10 مينۋت كەتەتىنىن ايتتى.
مەملەكەت باسشىسى قارۋ- جاراق ساتىپ الۋعا رۇقسات بەرۋدىڭ «وتە قاتاڭ» تەكسەرۋ ەرەجەلەرىن ەنگىزۋگە ۋادە بەردى. ونىڭ ايتۋىنشا، كەلەسى اپتادا شتات وكىلدەرىمەن مەكتەپتەردەگى قاۋىپسىزدىك تاقىرىبىن تالقىلاۋ جوسپارلانعان.
«ءبىز كوڭىلگە قونىمدى، ماڭىزدى ۇسىنىستاردى قابىلدايمىز جانە ونىڭ ىسكە اسۋىن قاداعالايمىز» ، - دەدى پرەزيدەنت.
قۇراما شتاتتاردا قارۋ ۇستاۋ قۇقىعى كونستيتۋتسياعا ەكىنشى تۇزەتۋ ەنگىزۋمەن كەپىلدەندىرىلگەن. ىقپالدى لوببيلەر قارۋ- جاراق ساتىپ الۋعا كەز- كەلگەن قوسىمشا شەكتەۋلەرگە قارسى تۇرادى. ساۋالناماعا سايكەس، امەريكالىقتاردىڭ باسىم بولىگى ينسپەكتسيا ەرەجەلەرىن قاتاڭداتۋدى قولدايدى.
قازىرگى ۋاقىتتا بۇرىن سوتتالعان، پسيحيكالىق اۋىتقۋى بار سياقتى باسقا دا فاكتور ساتىپ الۋشىنىڭ قارۋ يەلەنۋىنە كەدەرگى كەلتىرەدى، ءبىراق مۇنداي تالاپتار قاتاڭ تۇردە ساقتالا بەرمەيدى. ترامپ سايلاۋ الدىنداعى ناۋقان كەزىندە قارۋعا شەكتەۋ قويۋعا قارسى ەكەنىن ايتتى.
Baq.kz
