پەتروپاۆل اۋەجايى قازاقستان مەن رەسەي پرەزيدەنتتەرىنىڭ اۋە كەمەسىن كۇتىپ الۋعا دايىندالۋدا

پەتروپاۆل. قازاقپارات - پەتروپاۆل حالىقارالىق اۋەجايى بيىل قازاقستان مەن رەسەي پرەزيدەنتتەرىنىڭ اۋە كەمەسىن كۇتىپ الۋعا دايىندالۋدا، دەپ حابارلايدى «قازاقپارات» ح ا ا ءتىلشىسى.

ءوڭىرارالىق ىنتىماقتاستىق جونىندەگى XV فورۋم بيىل پەتروپاۆل قالاسىندا ءوتىپ، تۋريزم تاقىرىبىنا ارنالماق.

س ق و جولاۋشىلار كولىگى جانە اۆتوموبيل جولدارى باسقارماسىنىڭ باسشىسى بەيبىت يسمانوۆ «قازاقپارات» تىلشىسىنە مارتەبەلى قوناقتاردى كۇتىپ الۋعا اۋەجايدىڭ دايىندىعى تۋرالى ايتىپ بەردى.

ونىڭ مالىمەتىنشە، اۋە ايلاعىنداعى پەررون- تۇراق 2 دەن 8 گە دەيىن ۇلعايتىلماق. ول ءۇشىن 1 ميلليارد تەڭگە كولەمىندە قارجى جۇمسالادى.

اۋەجايعا دەيىنگى جولدار دا جوندەلەدى. جوبالىق- سمەتالىق جۇمىستار دايىندالىپ قويعان. 2016 -جىلعى جاڭعىرتۋ جۇمىستارىنان كەيىن پەتروپاۆل اۋەجايىنىڭ كەز كەلگەن ساناتتاعى ۇشاقتاردى قابىلداي الاتىن مۇمكىندىگى بار.

قازىردىڭ وزىندە پەتروپاۆل قالاسىنان استانا، الماتى، شىمكەنتكە ۇشىپ بارۋعا بولادى. رەيستەر سۋبسيديالانادى. بيىل الماتى جانە استانا باعىتتارىنا ارنالعان سۋبسيديا كولەمى 71 دەن 222 ميلليون تەڭگەگە ۇلعايتىلدى. شىمكەنتكە دەيىنگى اۋە باعىتىنا رەسپۋبليكالىق بيۋدجەتتەن 169 ميلليون تەڭگە ءبولىندى.

س ق و جولاۋشىلار كولىگى جانە اۆتوموبيل جولدارى باسقارماسىنىڭ مالىمدەۋىنشە، 2016 -جىلمەن سالىستىرعاندا 2017 -جىلى ۇشاق قىزمەتىن پايدالاناتىن جولاۋشىلار سانى ءتورت ەسەگە، ياعني 4 مىڭنان 16,8 مىڭعا دەيىن وسكەن.