شەتەلگە ساپار: ەلگە ءدىن امان ورالۋدىڭ جولى قانداي

استانا. قازاقپارات - ق ر دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ كوميتەتى ەل ازاماتتارىنا شەتەلدە بولعان كەزدە دەنساۋلىعىن بارىنشا قالاي قورعاۋ كەرەكتىگى تۋرالى كەڭەس بەردى، دەپ حابارلايدى قازاقپارات.

سونىمەن كوميتەت ينفەكسيالىق جانە پارازيتتىك اۋرۋلاردىڭ الدىن الۋ ءۇشىن، سونداي- اق دەمالىسىڭىز بۇزىلماس ءۇشىن ساياحات بارىسىندا مىناداي كەڭەس بەرەدى:

- ىشۋگە تەك بوتەلكەدەگى نەمەسە قايناتىلعان سۋدى پايدالانۋ. قايناماعان سۋدان دايىندالعان مۇزدى پايدالانباۋ كەرەك؛

- تەك بەلگىلى جانە تەكسەرىلگەن قوعامدىق تاماقتانۋ ورىندارىنا بارۋ؛

- جەمىستەردى، كوكونىستەردى ىشۋگە جارامدى سۋمەن جاقسىلاپ جۋۋ جانە قايناتىلعان سۋمەن شايۋ؛

- ەت، بالىق، تەڭىز ونىمدەرى تەرميالىق وڭدەۋدەن كەيىن پايدالانىلۋى ءتيىس؛

- تاماقتانار الدىندا قولدى سابىنمەن جۋۋ، قولعا ارنالعان انتيسەپتيكتەردى (سانيتايزەرلەردى) پايدالانۋ؛

- تەك باسسەيندەردە نەمەسە ارنايى سۋ قويمالارىندا عانا ءجۇزۋ؛

- تۇراتىن ورىندار (قوناقۇي بولمەسى، ءنومىرى جانە ت. ب. ) ماسالار ءۇشىن قولجەتىمدى بولماۋى ءتيىس (موسكيت تورلارى، ينسەكتيتسيدتى قۇرالدار، رەپەللەنتتەر)؛

- كەنەنىڭ شاعۋى مۇمكىن بولاتىن تابيعاتتا سەرۋەندەگەن ۋاقىتتا جەڭى ۇزىن اقشىل ءتۇستى كيىم، شالبار، ۇزىن كويلەك كيۋ قاجەت. دەنەنىڭ اشىق بولىكتەرىنە رەپەلەنتتەر پايدالانۋ كەرەك؛

ساپار ۋاقىتىندا نەمەسە ودان ورالعان كەزدە دەنساۋلىق جاعدايى ناشارلاعان كەزدە مىندەتتى تۇردە دارىگەرگە قارالۋ كەرەك.

سونىمەن قاتار كوميتەت الەمدەگى ەپيدەميولوگيالىق احۋالمەن دە بولىسكەن. ماسەلەن، تىرىسقاق الەمنىڭ 22 ەلىندە تىركەلگەن. نەگىزىنەن افريكانىڭ 16 ەلىندە كەڭىنەن تاراعان. ال ءسىبىر جاراسى الەمنىڭ 14 ەلىندە بار. اتالعان ەلدەر مىنالار: يندونەزيا، ءۇندىستان، قيتاي، بانگلادەش، قازاقستان، قىرعىزستان، فيليپپين، رۋمىنيا، گرۋزيا، تانزانيا، زامبيا، زيمبابۆە، كەنيا، گۆينەيا.

«س د س (ا ق ش اۋرۋلاردى باقىلاۋ جانە الدىن الۋ ورتالىعى) اقپاراتىنا سايكەس ەپيدەميالىق ماۋسىمنان باستاپ بالالار اراسىنان تۇماۋدان 37 ءولىم جاعدايى تىركەلگەن. جاپونيادا سوڭعى جىلدارداعى تۇماۋدىڭ ەڭ ۇلكەن ءورشۋى بايقالادى، بارلىعى 3 ميلليون جۋىق ادام ناۋقاستانعان، تەك سوڭعى اپتا بويى سىرقاتتانعانداردىڭ سانى 1 ميلليون ادامعا دەيىن ءوستى»، - دەپ اتاپ وتەدى كوميتەت.

ەستەرىڭىزدە بولسا، بۇعان دەيىن مىسىردا وتباسىمەن دەمالعان قازاقستاندىق ولەگ ۆاسيلەنكونىڭ دەنەسى ىرىڭدەپ، كۇلدىرەپ كەتكەندىگى بەلگىلى بولعان ەدى. مىسىرلىق دارىگەرلەر تەرىنىڭ كۇلدىرەۋ سەبەبىن انىقتاي الماعان بولاتىن. دياگنوز ەلورداعا كەلگەننەن كەيىن قويىلدى.

اۆتور: مارلان جيەمباي