اقپارات مينيسترلىگى قۇپيا قوڭىراۋدى انىقتايتىن قوسىمشانىڭ قولدانىسىنا شەكتەۋ قويدى
قوسىمشا كەشە جۇمىس ىستەپ تۇرعان. ال بۇگىن سمارتفوندارعا جۇكتەلگەنىمەن، تولىق اشىلماي تۇر.
«ساراپتاما جۇرگىزۋ بارىسىندا قوسىمشانىڭ «دەربەس دەرەكتەر جانە ولاردى قورعاۋ تۋرالى» زاڭناماعا قايشى تۇستارى انىقتالدى. سول سەبەپتى، قازاقستان رەسپۋبليكاسى اۋماعىندا موبيلدىك قوسىمشاعا شەكتەۋ قويىلدى»، - دەپ حابارلادى مينيسترلىكتىڭ باسپا ءسوز حاتشىسى ايگۇل ەسماعامبەتوۆا «قازاقپارات» ح ا ا تىلشىسىنە تەلەفون ارقىلى.
اتالعان قوسىمشا بەيتانىس قوڭىراۋ شالۋشىنىڭ اتى-ءجونىن كورسەتۋمەن قاتار، كەز كەلگەن ءنومىردىڭ باسقا ابونەنتتەردە قالاي ساقتالعانىن دا بىلۋگە مۇمكىندىك بەرەدى. كوپتەگەن قولدانۋشىلار بۇل قوسىمشا ادامداردىڭ جەكە باسىنا قاتىستى مالىمەتتەردى جاريالاپ، قۇپيالىعىن بۇزادى دەگەن پىكىردە.
ايتا كەتەيىك، ارمەنيانىڭ جەكە دەرەكتەردى قورعاۋ اگەنتتىگى ازاماتتاردى قوسىمشانى جۇكتەمەۋگە شاقىردى. سەبەبى، قوسىمشانى جۇكتەپ الۋشىلار ءوز ءتىزىمىن قولدانۋعا رۇقسات بەرەدى، وسىلايشا تەلەفون نومىرلەرىنىڭ بازاسى ۇلعايىپ، قاتىسۋشىلار سانى كوبەيەدى.
تاياۋ ۋاقىتتا Get Contact قوسىمشاسىنا ازەربايجان ەلىندە دە تىيىم سالىنعان بولاتىن.
