ەسەنقۇل جاقىپبەكتىڭ جىر جيناعى تۇرىك تىلىندە جارىق كوردى

الماتى. قازاقپارات - قازاقستان جازۋشىلار وداعىنىڭ مۇشەسى، پرەزيدەنت ستيپەندياسىنىڭ يەگەرى، مادەنيەت سالاسىنىڭ ۇزدىگى، اقىن مارقۇم ەسەنقۇل جاقىپبەكتىڭ «جازعى تاڭدا» جىر جيناعى تۇرىك تىلىندە جارىق كوردى، دەپ حابارلايدى قازاقپارات ءتىلشىسى.

كىتاپ قازاقستاننىڭ تۇركياداعى ەلشىسى ابزال ساپاربەك ۇلىنىڭ قولداۋىمەن، جازۋشى ياكۋب وماروعلى ءتوراعالىق ەتەتىن ەۋرازيا جازۋشىلار قاۋىمداستىعىنا قاراستى «بەنگۋ» باسپاسىنان شىعىپ وتىر.

تاڭداۋلى توپتاماعا اقىننىڭ ءار جىلدارى جازعان ءومىردىڭ وزىنەن الىنعان وي- تولعامدارى، ليريكالىق شىعارمالارى، انگە اينالعان ولەڭدەرى كىرگەن.

باسپا بازارلىعى ابزال ساپاربەك ۇلىنىڭ «ءتاڭىرتاۋدىڭ داۋىسى»، ەۋرازيا جازۋشىلار قاۋىمداستىعىنىڭ ءتوراعاسى ياكۋب وماروعلىنىڭ «ماحابباتتى سۇيگەن اقىن» اتتى كىرىسپە سوزىمەن باستالعان. سونداي-اق ۇلتتىق سپورت تۇرلەرى قاۋىمداستىعىنىڭ قۇرمەتتى پرەزيدەنتى، گەنەرال-مايور، رۋحانيات جاناشىرى قايرات ساتىبالدىنىڭ «ەلىن سۇيگەن، ەلى سۇيگەن اقىن» دەگەن تاقىرىپپەن العى ءسوزى بەرىلگەن.

- وتپەلى كەزەڭ دەپ اتالاتىن قازاقستان تاۋەلسىزدىك العان ۋاقىتتان بۇرىن جانە كەيىنگى جىلدارى اتى اڭىزعا اينالىپ، ولەڭدەرى حالىققا كەڭ تاراعان اقىنداردىڭ ءبىرى - ەسەنقۇل جاقىپبەك. قازاقتىڭ قارا ولەڭىن قاستەرلەپ، ايتىس الامانىندا تالايدىڭ تاڭدايىن قاقتىرعان بىرەگەي تالانت ءوزىنىڭ اقىندىق مەكتەبىن قالىپتاستىرىپ، كومپوزيتورلىق قىرىن تانىتتى. ەل- جۇرتپەن ەتەنە ارالاسا ءجۇرىپ، ءسوز ونەرىنىڭ ءىنجۋ-مارجانىن تەرىپ، قازاق پوەزياسىنىڭ كوركەم ۇلگىسىن جاسادى. دارەجەسىن كوتەرىپ، جاڭا بيىككە شىعاردى. سۋرەتكەر اقىننىڭ جىر جيناعىنىڭ تۇرىك تىلىنە اۋدارىلۋى قازاق ادەبيەتىنىڭ عانا ەمەس، تۇركى الەمى ادەبيەتىنە قوسىلعان التىن قازىنا دەپ ەسەپتەيمىن. ءتۇبى ءبىر تۋىستاس ەلدەردە دە ءوز وقىرمانىن تاۋىپ، سۇيىسپەنشىلىگىنە بولەنەرىنە سەنەمىن، - دەيدى ەلشى ابزال ساپاربەك ۇلى.

ەۋرازيا جازۋشىلار قاۋىمداستىعىنىڭ ءتوراعاسى، جازۋشى ياكۋپ وماروعلى: «بۇگىنگى تاڭدا قازاق اقىن- جازۋشىلارى ءوز شىعارمالارى ارقىلى الەم ادەبيەتىنىڭ دامۋىنا، ۇلتتار اراسىنداعى دوستىقتىڭ نىعايۋىنا ءوز ۇلەسىن قوسىپ كەلەدى. اباي، ماعجان، قاسىم، قادىر، تۇمانباي سىندى اقىنداردىڭ داستۇرىمەن اعارتۋشىلىق كوشتى جالعاستىرا بىلگەن اقىننىڭ ءبىرى - ەسەنقۇل جاقىپبەك. ول فيلوسوفيالىق كوزقاراسىمەن، ۇلتتىق پوزيتسياسىمەن ءوز ەرەكشەلىگىن كورسەتتى. اقىن پوەزياسىنداعى ءومىر مەن ءولىم، وي مەن سەزىم، كۇن مەن ءتۇن ءتاڭىرتاۋدىڭ اينالاسىندا ورىلەدى. ءار تۋىندىسىندا تابيعاتپەن بىتە قايناسىپ، تاۋدىڭ ەتىگىندەگى ءومىردىڭ شىنايى بەينەسىن، ءتۇرلى- ءتۇسى بوياۋىن انىق كورۋگە بولادى. ەسەنقۇل - شىنايى اقىن، ولەڭدەرىنىڭ فورماسى بۇرىنعى قازاق اقىندارىنىڭ ستيلىنە ۇقسايدى، ءداستۇرلى پوەزيانىڭ جالعاسى ىسپەتتى. بولاشاقتا ولەڭدەرى الەم تىلدەرىنە اۋدارىلىپ، وقىرمان جۇرەگىنە جەتەدى دەپ ۇمىتتەنەمىن»، - دەيدى.

ۇلتتىق سپورت تۇرلەرى قاۋىمداستىعىنىڭ قۇرمەتتى پرەزيدەنتى، گەنەرال- مايور، رۋحانيات جاناشىرى قايرات ساتىبالدى «ەسەنقۇل جاقىپبەكتىڭ قاي تۋىندىسىن وقىساڭىز دا كوركەم وي، كەستەلى ءتىل، سىرشىل سۋرەتىمەن ەرەكشەلەنەدى. انگە اينالعان شىعارمالارى ءبىر توبە. شىعۋ تاريحى اڭىزعا اينالىپ، حالىقتىڭ اۋزىندا جۇرگەن بىرەگەي تۋىندىلار. ارتىندا قالعان مول مۇراسىن ەندىگى جەردە ەلگە جەتكىزۋ، كەلەر ۇرپاققا ناسيحاتتاۋ، جيناقتارىن شىعارۋ، مۇراجايىن اشۋ، ەسكەرتكىشىن تۇرعىزۋ - رەت- رەتىمەن اتقارىلا بەرەتىن شارۋالار. ەل ىقىلاسىنا ەرەكشە بولەنگەن كورنەكتى اقىننىڭ جاھۇت جىرلارىنىڭ تۇرىك تىلىنە اۋدارىلىپ، تۇركيا تورىندە ناسيحاتتالۋى ەلىمىز ءۇشىن زور قۋانىش، قازاق ادەبيەتى ءۇشىن ۇلكەن جەتىستىك، ۇلت رۋحانياتىنا قوسىلعان سۇبەلى ۇلەس دەپ بىلەمىز» دەپ، كىتاپتىڭ جارىق كورۋىنە ۇلەس قوسقان ازاماتتارعا العىس بىلدىرەدى.

ولەڭدەردى تۇرىك تىلىنە اۋدارعان جازۋشى، ديپلومات مالىك وتاربايەۆ.

رەداكتورى - تۇرىكتىڭ تانىمال اقىنى اتامان كالەبوزان.

ۇيلەستىرگەن الماتى وبلىستىق مادەنيەت، ارحيۆ جانە قۇجاتتاما باسقارماسىنىڭ باسشىسى اقان ءابدۋالى. قۇراستىرعان - قازاقستان جاستار وداعى «سەرپەر» سىيلىعىنىڭ يەگەرى، جۋرناليست قانشايىم بايداۋلەت.

كىتاپتىڭ تۇساۋكەسەر ءراسىمى 9 -اقپان، ساعات 10.30-دا الماتى وبلىسى جامبىل اۋداندىق مادەنيەت ۇيىندە وتەدى.

شاراعا قازاقستان ەلشىلىگىنىڭ ديپلوماتى، جازۋشى مالىك وتاربايەۆ، تانىمال تۇرىك اقىنى اتامان كالەبوزان حانىم، ەۋرازيا جازۋشىلار قاۋىمداستىعى وكىلى حۋسەين كالەبوزان بەي ارنايى كەلەدى. سونداي- اق الماتى وبلىسى مادەنيەت، ارحيۆ جانە قۇجاتتاما باسقارماسىنىڭ باسشىسى اقان ءابدۋالىنىڭ، جامبىل اۋدانىنىڭ اكىمى جانداربەك دالابايەۆتىڭ، قازاقستان جازۋشىلار وداعى باسقارماسىنىڭ، زيالى قاۋىم وكىلدەرى مەن ونەر ادامدارىنىڭ قاتىسۋىمەن وتەدى.

كىتاپ ەلباسى نۇرسۇلتان نازاربايەۆتىڭ «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋى مەن «بولاشاققا باعدار: رۋحاني جاڭعىرۋ» باعدارلاماسى اياسىندا جارىققا شىعىپ وتىر.