قىتاي ۆيزاسىنا قاتىستى ب ا ق- تاعى اقپاراتتىڭ جارتىسى دالەلسىز - باس كونسۋل

 استانا. قازاقپارات - قازاقپارات - قىتايدىڭ الماتىداعى باس كونسۋلى چجان ۆەي تۋريستەر ءۇشىن قىتاي ۆيزاسىن الۋ قيىنداعاندىعى تۋرالى اقپاراتقا پىكىر ءبىلدىردى، دەپ حابارلايدى قازاقپارات ءتىلشىسى.

 «ۆيزاعا قاتىستى بۇقارالىق اقپارات قۇرالدارىندا جازىلىپ جاتقان ماسەلەلەر ءبىزدىڭ نازارىمىزدى اۋدارتتى. جازىلعان ماقالالاردىڭ جارتىسى شىنايى اقپاراتقا سايكەس كەلمەيدى. وبەكتيۆتى دالەلدەر جوق. كوبىسى ويدان شىعارىلعان. باس كونسۋلدىق، ەلشىلىك رەتىندە ءوز قۇزىرەتىمىزدەگى مۇمكىندىكتەرىمىز بويىنشا عانا ۆيزا بەرەمىز. ۆيزانى بەلگىلەنگەن ءتارتىپ بويىنشا بەرەمىز. ول ساياساتتى ءبىز جاساعان جوقپىز. قازاقستان تۋريستەرى ءۇشىن ۆيزا راسىمدەۋدى جەڭىلدەتۋگە بارىنشا كۇش سالاتىن بولامىز. ول ءبىزدىڭ جۇمىسىمىزدىڭ ءبىر باعىتى. ءوزىمىزدىڭ مينيسترلىككە بۇل ماسەلە بويىنشا ۇسىنىسىمىز بەن كەڭەسىمىزدى جولدادىق» ، - دەدى باس كونسۋل.

 چجان ۆەي ۆيزا الۋدى جەڭىلدەتۋ باعىتىندا ءبىرقاتار جۇمىستار اتقارىلعانىن اتاپ ءوتتى.

«بۇگىنگى كۇنى قىتاي- قازاقستان قارىم- قاتىناسى دامىپ، ءتۇرلى سالادا كەڭەيىپ كەلەدى. باس كونسۋلدىق ۆيزالىق قولداۋ ەرەجەلەرى مەن ساياساتى اياسىندا ەكى ەل ازاماتتارىنىڭ قاتىناسى جايلى بولۋى ءۇشىن ۆيزا راسىمدەۋگە بارىنشا كومەكتەسىپ كەلەدى. ءبىز قابىلداۋ كۇندەرىن، ۋاقىتىن، كادرلار سانىن كوبەيتۋ، قوسىمشا قابىلداۋ تەرەزەلەرى مەن ىشكى پروتسەستەردى وڭتايلاندىرۋ سەكىلدى شارالاردى ىسكە اسىرىپ جاتىرمىز. ۆيزا الۋعا ءوتىنىش بىلدىرگەندەر ىشىندە قارت ادامدار مەن جەرلەۋ راسىمىنە كەتىپ بارا جاتقان ادامداردىڭ قۇجاتتارىن ءبىرىنشى كەزەكتە راسىمدەۋ ءۇشىن «جاسىل ءدالىز» اشتىق. تەلەفون كەڭەسىن ىسكە قوستىق. قىتايدىڭ شەتەل ازاماتتارى ءۇشىن جاسالعان ۆيزا ساياساتى وزگەرگەن جوق» ، - دەپ ءسوزىن قورىتىندىلادى چجان ۆەي.

 ايتا كەتەيىك، قازاقستاندىق جەكەلەگەن ب ا ق- تا 2018 -جىلدىڭ 1 - اقپانىنان باستاپ قىتاي تۋريستىك ۆيزانى بەرۋگە شەكتەۋ قوياتىندىعى تۋرالى اقپارات تاراعان بولاتىن.