شەتەلدەگى قازاق ءتىلدى جۋرناليستەر استانادا شەبەرلىكتەرىن شىڭدايدى

استانا. قازاقپارات - شەتەلدەگى قازاق ءتىلدى جۋرناليستەر استانادا تاعىلىمدامادان وتەدى، دەپ حابارلايدى قازاقپارات ءتىلشىسى.

شەتەلدەگى قازاق جۋرناليستەرىنە ارنالعان تاعىلىمداما «ەگەمەن قازاقستان اكادەمياسى» جوباسى اياسىندا جۇرگىزىلەدى.

«بيىل «ەگەمەن قازاقستان اكادەمياسى» اتتى كەڭ اۋقىمدى جوبانى جۇزەگە اسىرۋدى باستايمىز. ەگەمەن قازاقستان اكادەمياسى شەتەلدەگى، سونىڭ ىشىندە موڭعوليا، وزبەكستان، قىرعىزستان ەلدەرىندەگى قازاق جۋرناليستەرىنە ارنايى سەمينارلار كۋرسىن ۇيىمداستىرۋ، جەرگىلىكتى جۋرناليستەردى اعىلشىن تىلىندە اقپارات تاراتۋ بويىنشا تاعىلىمدامادان وتكىزۋ، جۋرناليستيكا فاكۋلتەتتەرى ستۋدەنتتەرىنىڭ كاسىبي شىڭدالۋىنا مۇمكىندىك جاساۋ، وڭىرلىك جانە سالالىق باسپا ءسوز قۇرالدارىنا اقپاراتتىق- ادىستەمەلىك جانە كونسۋلتاتيۆتىك- ترەنينگتىك قولداۋ كورسەتۋ سىندى باعىتتاردا جۇمىس ىستەيدى»، - دەپ مالىمدەدى «ەگەمەن قازاقستان» ا ق باسقارما ءتوراعاسى دارحان قىدىرالى ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

بۇعان دەيىن حابارلاعانىمىزداي، بيىلعى ناۋرىز ايىنان باستاپ «ەگەمەن قازاقستان» گازەتىنىڭ اتاۋى لاتىن الىپبيىنە اۋىستىرىلادى. سونداي-اق باسىلىمنىڭ كۇندەلىكتى 12 بەتى 16 عا ارتىپ، جاڭا قوسىمشالارمەن اپتاسىنا ءبىر رەت 24 بەتپەن شىعاتىن بولادى.