تارازدا لاتىن قارىپىندە جازىلعان قۇجاتتاردىڭ كورمەسى ءوتتى
جامبىل وبلىستىق مادەنيەت، ارحيۆ جانە قۇجاتتار باسقارماسى جەتەكشىسىنىڭ ورىنباسارى سارا مادييەۆانىڭ ايتۋىنشا، وبلىستىق مەملەكەتتىك ارحيۆىندە 30- ، 40- جىلدارداعى لاتىن ءالىپبيى نەگىزىندە قازاق تىلىندە جازىلعان قۇجاتتار بار.
«ءبىز 1929-1940 -جىلدار ارالىعىندا لاتىن الىپبيىمەن جازىلعان بارلىق قۇجاتتاردى زەردەلەپ، جاريالادىق. ولاردىڭ بارلىعى دا لاتىن ءالىپبيىنىڭ سول كەزدەردە- اق ءتيىمدى پايدالانىلعانىن كورسەتەدى. بۇعان قالىڭ كوپشىلىكتىڭ كوزىن جەتكىزۋ ءۇشىن بۇگىنگى كورمەنى ۇيىمداستىرىپ وتىرمىز»، - دەپ ءتۇسىندىردى ول.
سيرەك كەزدەسەتىن قۇجاتتاردىڭ اراسىندا 1935 -جىلدىڭ 17 -ناۋرىزىندا جامبىل پەداگوگيكالىق ۋچيليشەسىنىڭ جۇمىس ىستەي باستاعاندىعى تۋرالى قۇجات ەرەكشە اتاۋعا تۇرارلىق. قالا تۇرعىندارى اراسىندا ساۋاتسىزدىقتى جويۋ تۋرالى شەشىم دە بار، وعان قاراپ 1929 -جىلى لاتىن الىپبيىنە كوشەتىن تۇستا ارنايى كوميسسيا مەن ساۋاتسىزدىقتى جويۋ جونىندەگى كۋرستار ۇيىمداستىرىلعاندىعىن، ۇستازداردى وقىتىپ، ءبىلىم بەرۋ باعىتىندا شارالار جۇزەگە اسىرىلعاندىعىن كورۋگە بولادى.
مۇراعاتتى لاتىن قارىپىندە جاريالاعان باسىلىمداردىڭ تىگىندىلەرى دە بار. مىسالى سارىسۋ اۋداندىق «سوتسياليستىك شارۋا» باسىلىمى 1941 -جىلعا دەيىن لاتىن جازۋىمەن شىعىپ تۇرعان. كورمەدە ەكىنشى دۇنيەجۇزىلىك سوعىستىڭ باتىرى، جامبىلدىق مەرگەن يبراگيم سۇلەيمەنوۆتىڭ مايداننان لاتىن قارىپىندە جازعان حاتتارى ساقتالعان. جامبىل مۇراعاتتارىندا 1930-1934 -جىلدارداعى قۇجاتتار، اۋدانداردىڭ باستاۋىش پارتيا ۇيىمدارى جيىندارىنىڭ حاتتامالارى، اۋداندىق كوميتەتتەر مەن اۋداندىق اتقارۋ كوميتەتىنىڭ سونداي- اق كولحوزداردىڭ قاۋلىلارى مەن شەشىمدەرى بار.
قازاق ءتىلىنىڭ لاتىن الىپبيىنە كوشۋ ۇدەرىسىنە جاھاندىق وزگەرىس رەتىندە ەمەس، بۇرىن قولدانىلعان الىپبيگە قايتا ورالۋ دەپ قاراعان ءجون. ال قازاقستان تۇرعىندارىنا ءبىلىم بەرۋدىڭ قازىرگى زامانعى ۇلگىسى بۇل ۇدەرىستى جەدەل، ءتيىمدى ەتەدى، دەپ ەسەپتەيدى وبلىستىق مادەنيەت، ارحيۆ جانە قۇجاتتار باسقارماسىنىڭ ماماندارى.
