پاۆلودار تۇرعىنى اۆتوبۋستى قوناق ۇيگە اينالدىرعان - فوتو

استانا. قازاقپارات - وسىلايشا «ونەرتاپقىش» جۇرگىزۋشى ليتسەنزياسىنىڭ جوقتىعىنا قاراماستان جولاۋشىلاردى الىس جولعا تاسىمالداۋمەن اينالىسىپ جۇرە بەرگەن، دەپ حابارلايدى قازاقپارات.

پاۆلودار تۇرعىنى كليەنتتەرىنە قولايلى جاعداي جاساۋ ءۇشىن اۆتوبۋستىڭ ورىندىقتارىنىڭ قۇرىلىمىن وزگەرتكەن. قاجەت كەزدە ول ورىندىقتار ءاپ- ساتتە جاتىن ورىنعا اينالىپ شىعا كەلەدى.

جۇرگىزۋشىنىڭ جولاۋشىلاردى قالاي جينايتىنى، ال پاۆلودار وبلىستىق جول- پاترۋلدىك پوليتسيا قىزمەتكەرلەرىنىڭ اۆتوبۋس سالونىن زاڭعا قايشى بولعاندىعىنا قاراماستان وزگەرتىپ، جولاۋشىلاردى جەرىنە تاسىمالداپ جۇرگەنىن قالايشا كورمەي جۇرگەندىگى انىقتالۋدا. اۆتوبۋستى قاراعاندى وبلىستىق جەرگىلىكتى پوليتسيا قىزمەتىنىڭ جول- پاترۋلدىك پوليتسيا وكىلدەرى «سوقىر» بەكەتىندە توقتاتقان. كولىك ەكىباستۇز- الماتى باعىتىمەن جىلجىپ بارا جاتقان.

پوليتسەيلەردىڭ نازارىن ورىندىقتاردى ورنىنا قويىلعان توسەكتەر اۋدارعان. «جولاۋشىلار ورىندىقتاردىڭ اراسىندا ورنالاستىرىلعان جاتاتىن ورىندارعا جايعاسقان. پاۆلودار تۇرعىنىنىڭ ورىندىقتاردى «توسەككە» اينالدىرۋعا رۇقساتى بولماعان. سونداي-اق جۇرگىزۋشى مەن ونىڭ كومەكشىسىنىڭ ەكەۋىندە دە جولاۋشىلاردى تاسىمالداۋعا بەرىلەتىن ليتسەنزيا جوق بولىپ شىقتى»، - دەپ حابارلادى قاراعاندا وبلىستىق ءى ءى د- نىڭ جەرگىلىكتى پوليتسيا قىزمەتىنىڭ وكىلدەرى.

اۆتوبۋستىڭ قۇرىلىمىن رۇقساتسىز وزگەرتىپ، ليتسەنزياسىز جولاۋشىلاردى تاسىمالداعانى ءۇشىن جۇرگىزۋشىگە ۇلكەن ايىپپۇل سالىنادى. ايىپپۇل كولەمىن سوت انىقتايدى. جۇرگىزۋشى زاڭسىز ارەكەتتەرىن قايتالاماس ءۇشىن، قاراعاندى پوليتسياسى ۇسىنىستى پاۆلودار وبلىسىنا جولدادى. «اۆتوبۋس» جەدەل الدىن الۋ شاراسى بارىسىندا قاراعاندى وبلىسىندا قوعامدىق كولىك جۇرگىزۋشىلەرى تاراپىنا جول ەرەجەسىن ءبۇزۋدىڭ 563 جاعدايى تىركەلدى.